Kommuneqarfik Sermersuumi qinersisoqarnissaanut pissangatitsisoqarpoq. Inatsisartunut qinersinerup kingorna kina borgmesterinngussanersoq nalorninartoq.

Charlotte Ludvigsen borgmesteriunermini suliatigut kanngunartuliai arlallit kommunalbestyrelsillu tatiginnikkunnaarnerat pissutigalugit tunuartariaqarnerani Avaaraq S. Olsenip (IA) 2022-mili taarserlugu borgmesterinngorpoq.

Tamatuma kingorna Avaaraq Olsen kommunalbestyrelsit ataatsimuulerseqqinnissaannut, politikkerillu eqqissisimasumik suleqatigiileqqinnissaannut pilersitsinissaminut akisussaasunngorpoq.

Soraarnerussutisiallit amerliartortillugit saniatigut sulisarsinnaanerinik Avaaraq Olsen (IA) kissaateqarpoq: - Utoqqartavut suliffeqarfinnut utertikkusuppavut soorunami ulloq tamakkerlugu sulisinnagit. Assersuutigisinnaavarput soraarnerussutisialik Karen ulapaarfiunerani ullaakkut ualikkullu akunnerit marluk panima meeqqeriviani ikiuuttarpoq. Tamanna takoreerlutigu kommunalbestyrelsimiit meeqqerivinnut tamanut periarfissaq atulersikkusullugu oqaatigaarput. Assi © : KNR / Markus Valentin

- Assortuunnerujussuaqarnikuuvoq. Ataatsimiittarfimmut isileraangatta allaaneq ajorpoq sorsuffimmukarluni.tamanna katersisinnaasumik tusarnaarsinnaasumillu borgmestereqartariaqarsimavoq, Avaaraq Olsen oqarpoq.

Angusani tanngassimaarutigigaluaqalugit borgmesterinngorniunnermi marlunnik unammillerteqarpoq: Siumumeersoq Martha Abelsen aamma Demokraatineersoq Poul Petersen.

Borgmesteri nuimanngitsoq

Kommunalbestyrelsimi allaffeqarfimmilu eqqissinermik pilersitsinera iluatsippoq immaqa ingasaatilaarlugu, Avaaraq Olsen oqarpoq.

- Maanngaanniit nipaappallaartugut taxartitsisup ungasinngitsumi oqarfigaanga. Taamaammat eqqissisimavallaalersimanerluta eqqarsaatigilerpara. Ukiuni marlunni Kommunalbestyrelseqarpugut isumaqatigiittunik suliniuterpassuillu pitsaasut angusaqarfiulluarnikuupput. Tamakkuli tusagassiutitigoorpallaarnikuunngillat. Immaqa aaqqiagiinnginnerit soqutigineqarneruneri pissutaallutik.

Partiit akimorlugit ukiuni kingullerni marlunni suleqatigiilluartoqarsimanera isumaqataaffigalugu unammillertai marluullutik KNR-imut oqarput.

Martha Abelsenip utoqqarnut inissianik nutaanik sanaartortoqartikkusuppaa: - Sooruna utoqqaat ataatsimoorfigisinnaasatsinnik Tuapannguanitut ittunik illorsualiortitersinnaanngitsugut, naqqani ataatsimoorfissalerlugu, utoqqaallu najugaqartut inunnik aggersaasinnaanngorlugit, meeqqerivimmiunik atuartunilluunniit pulaartoqarsinnaanngorlugit, illoqarfimmi inuiaqatigiinnut eqeersimaartumik ilaatinneqalerlutik. Nuummi, Paamiuni Tasiilamiluunniit najugaqarneq apeqqutaatineqarnani. Taamaaliornikkut utoqqaat tunniussinnaasaat nalitoqisut inuiaqatigiinnut ingerlateqqinneqarsinnaanngussammata. Assi © : KNR / Malik Brøns

Naak kommunimi aalajangiisarnerit pilersaarutillu borgmesterinngornerminili suliarineqarsimasut, innuttaasunik inuussutissarsiornerullu iluani peqataatitsinerat qaffariarsimagaluaqisoq, Avaaraq Olsen kommunimi innuttaasunut takussaavallaarsimanngitsoq, Martha Abelsen isumaqarpoq.

- Peqataatitsineq allaanerusoq maqaasivara, Martha Abelsen oqarpoq nangillunilu:

- Borgmesterip ujartuinerunissani nammineerluni suliassaraa. Katersortarfimmut aggersaagaangatta taakkuttartumininnguit taakkuusartut ilisimareerparput. Inuiaqatigiit ullumikkumiit allaanerusumik peqataatinneqassapput. Nuimasumik borgmestereqartariaqarpugut, tamannami massakkut piginngilarput.

Kommunimi ukiuni taakkunani akisussaaffeqarnermini suleqatigisartakkanut saaffiginnissuteqartarluni Avaaraq Olsenip oqaatigaa.

- Illoqarfiit pingaarnersaannut periusissaq pillugu oqallinnerujussuaqarnikuuvoq. Workshopinut innuttaasut 1000-it tungaannut, tassani inuussutissarsiutinik ingerlatsisunik, NGO-nit, inuusuttunik, utoqqarnik nunaniillu allanit nunasisut digitalikkut apersuinerit ornigulluni ataatsimiinnikkut apeqqutillu immersugassat atorlugit peqataatsitsinikuuvugut.

- Innuttaasunik peqataatsitsiumanerulluta immikkoortut ilaannik kinguartitsisarnikuuvugut. Akunnittarfiit immikkoortortaqarfii allaffeqarfimmiit, inuussutissarsiutinik ingerlatsisut tusaaneqarnatik misigisut pillugit paasitinneqarnikuuvugut. Unitsitseriarluta sulissutigisarput aallaqqaataaniit aallarteqqipparput.

Utoqqarpassuanngulersut

Kommuneqarfik Sermersuumut apeqquterujussuaq tassaavoq, Avaaraq Olsenip oqarneratut ‘utoqqarpassuit’. Kinguaariippassuit ukiuni tallimani tulliuttuni suliffeqarfiit qimangajalerpaat soraarnerussutisiaqalerlutillu.

Taamaattumik kommuni nutaamik eqqarsartariaqalerpoq. Utoqqarnik kiffartuussinermik suliaqartunik ataannartitsinissamut pikkorissaanissamullu, suliniut tamakkiisumik sammivilik ukkatarineqartariaqartoq, aamma utoqqalilluni inuuniarneq akikinnerusariaqarpoq, Avaaraq Olsen oqarpoq.

Utoqqaat soraarnerussutisiaqalerunik Kalaallit Nunaanniiginnarnissaat qanoq qulakkeerniarpiuk?

- Nuummiittorpassuit qanigisaminnik utoqqarnik ilaqutaqanngillat. Nunatsinni utoqqarnik qanigisaqarneq pingaartitaraarput. Tamaani najugaqarneq akikinnerussammat utoqqarnut suliniuteqareerpugut. Assersuutigalugu bussit akeqanngitsut, nalukkiarsinnaaneq, peqatigiiffinni atugassarititaasut pitsaanerusut, borgmesteri oqarpoq.

Paamiuni Tasiilamilu inissialiornerit akitsornikuusut, Demokraatinit borgmesterimut qinigassanngortittoq Poul Petersen oqarpoq. Taamaattumik inissialiortitsinernut tassunga ilanngullugu utoqqarnut inissialiornernut kommuni aningaasaliinerusalerniassammat missingersuutinuut inatsip allanngortinneqarnissaa sulissutigerusuppaa. Assi © : privat

Innuttaasut siunissami ikilisussaapput. Utoqqaat amerlanerusut suliunnaarunik akileraarutitigut isertitat appartussaapput. Tamatuma saniatigut utoqqaat pitsaanerusumik inuuneqartinnissaat qulakkeerniarlugu bussinik, naluttarfinnit allanillu akeqanngitsumik atuisinnaatitsivutit. Kommunip aningaasanik ikinnerusunik pissarsinerani qanoq ililluni annertunerusunik atuisoqarniarpa?

- Arlalinnik suliniuteqartoqarpoq. Inuit amerlanerusut sulilersissavagut. Meeqqat atuarfianniinneranni suliffeqarluni inuuneqarnermut piareersaassaagut. Inuusuttut sulilersissinnaagutsigut uanga nammineq nuannarissavara. Uanga nammineq aqqanilinnik ukioqarlunga - timersortarfimmi ilaatigullu aaqqissuussinerni sulilerpunga - taamali malittarisassat allaanerupput. Tamanna periarfissiisorujussuuvoq.

- Meeqqanut ilaqutariinnullu politikkimik angerlarsimaffiup avataanut inissiisoqarnissaanik pinaveersaartitsinermik ukkataqartumik siorna akuersissuteqarpugut. Meeqqanut ilaqutariinnullu susassaqarfimmut ukiumut 400 millionit missaannik atuisartugut takusinnaavara. Aamma isumaginninnermi susassaqarfimmut assersuutigalugu siusinnaartumik soraarnerussutisiaqartunut aningaasarpassuarnik aamma atuisarpugut. Aningaasanik eqqortumik qanoq atuisinnaanitta misissornissaanut tunngavoq.

Suliffissaaleqisugut ikittunnguupput, taakku ukiuni kingullerni ikilingaatsiarsimapput. Tamanna pitsaasuuvoq. Siusinaartumik soraarnerusutisiaqalernissartik pissutigalugu piffissami sivisuumi ilungersorlutik suliniuteqarsimasunut sulileqqinnissaannik oqaaseqassaguit tamanna oqaloqatigiinneq artornartuussanngila?

- Siusinaartumik soraarnerussutisianut maanna atuuttunut aaqqissuussineq allanngortinnianngilarput. Amerlasuut ullormut akunnerni arfineq-pingasuni sulisinnaannginnertik pissutigalugu siusinaartumik soraarnerusutisiaqarput. Siusinaartumik soraarnerusutisiaqartitsineq pinngikkaluarlugu amerlanerusunik piffissap ilaani sulisitsisalernissamut kommunitut siulliusariaqartugut isumaqarpunga, Avaaraq Olsen oqarpoq.

Martha Abelsenip oqarnera naapertorlugu utoqqaat kommunimit ikiortariaqalinnginnerminni sivisunerusumik nammineq najugaqarnissaanut kommunip utoqqarnut amerlanerusunik inissialiornissaa pisariaqartinneqarpoq. Suliniut tamanna Avaaraq Olsenip aamma isumaqatigaa.

Borgmesterip isumassarsiaq isumaqataaffigilluinnarpasippaa. Suleqatiginnikkusussuseqartoqannginneratigut akerliusoqarnera imaluunniit suliniuteqartoqarnera misigisarpisiuk?

- Aallartissutigisattuli pingaartumik qinigaaffiup affaani kingullermi suleqatiginnikkusuttoqangaatsiarnera misigivara, piffissami tassani utoqqarnut inissialiornissaq pingaarnerutillugu sammivarput, Martha Abelsen oqarpoq.

Inatsimmut allannguineq aningaasassaqartitsinerussasoq

Demokraatit borgmesterimut qinigassanngortitaata, Poul Petersenip oqarnera naapertorlugu Kommuneqarfik Sermersuumi inissianik sanaartorneq ilungersunangaarmat inissarsiortut 2.000-iuput. Utoqqaallu inissianik kisimik pisariaqartitsinngillat. Aamma inuussutissarsiuteqartut ilinniartullu.

Taamaammat anguniakkat anguneqassagunik aningaasanik amerlanerusunik pisariaqartitsisoqartoq, Poul Petersen isumaqarpoq. Taamaammat missingersuutinut inatsit allanngortikkusuppaa.

- Missingersuutinut inatsit kommunit aningaasaqarnikkut ajutuunnginnissaat siunertaraat, kisianni aamma killilersuiffiusarpoq. Taamaamat piffissamut naleqqunnersut misissornissaat pingaaruteqarpoq. Kinguartooqqasutut misigiinnavippugut.