Qineqqusaarnissamut tapiisoqassanngilaq
Politikerit innuttaasut juullimut tunissutissaminnut qaammatini aqqaneq marlunni aningaasanik katersinissaminnut piffissaqarnerarlugit taamaattumillu juullertinnagu decembarimi akissarsitinneqarnissaminnik pisariaqartitsinnginnerannik oqaluttut qineqqusaarnissaminnut aningaasassaarupput, naak partiit ukiut sisamangajaat aningaasanik katersinissaminnut periarfissarisimagaluarlugit.
Demokraatit tungaannit, aningaasaqarnermut ataatsimiititaliap siulittaasua Anda Uldum oqaluttuarpoq partiit qineqqusaarnissamut aningaasanik tunineqarnissaannik qinnuteqaataata suliarininissaata itigartitsinneqarnissaa aningaasaqarnermut ataatsimiititaliap tamakkiisup isumaqataaffigigaa.
-Missingersuutinut inatsimmut naapertuutinngilaq, taamaammat partiit qineqqusaarnissaannut tapiiffigisinnaanngilagut. Partiit ukiut sisamat ingerlanerini aningaasanik katersisinnaasimanngikkunik piffissaagallartillugu iliuuseqarsimassanngillat. Kialluunniimmi nalunngilaa ukiut sisamakkuutaarlugit kommunimut qinersisoqartartoq, partiilli ilaasa immaqa aningaasaliiffigeqqinneqarnissartik naatsorsuutigiinnarsimavaat. Tamannalu Aningaasaqarnermut ataatsimiititaliami maanna itigartitsissutigaarput, Anda Uldum knr.gl-imut oqarpoq.
Qinnuteqaat inatsisartunut qinersinerup kingorna aningaasaqarnermut ataatsimiititalianngortussap aatsaat suliarisinnaagaa, aningaasaqarnermut ataatsimiititaliaq ataatsimiinnermini imaqarniliami allappoq.