Qimussertartoq Rita Inûsugtok arnat ulluat pillugu: Angutit unammillersinnaavagut assigiinnillu suliaqarsinnaalluta
Ullumi marsip arfineq-pingajuat tassaavoq nunarsuaq tamakkerlugu arnat ulluat.
Ulloq tamanna Rita Inûsugtumut ullumikkut soqutaavallaarunnaarnikuuvoq. Ukiulli qulit matuma siorna arnat ulluat Ritamut pingaaruteqarluinnarpoq.
AAMMA ATUARUK Rita Avannaata Qimussersuanut
- Kangaatsiap eqqaani avannaata qimussersuanut anngunniunnermi arnat ulluanni angutit tununniittoralugit arnartatuaallunga ajugaaffiginikuuakka.
37-nik ukiulik Rita Inûsugtok oqaluttuarpoq. Taanna nunaqarfimmi Ikerasaarsummi peroriartorpoq, massakkullu Maniitsumi najugaqarluni.
Nunani tamalaani arnat ulluat 1977-imit atulersinneqartoq Naalagaaffiit peqatigiinnit akuerisaavoq.
Nalliussisarnerlu Kinami, Cubami, Makedoniami, Ugandami Vietnamimilu nalliussineqartarpoq.
Taanna arnat ulluani marloriarluni Avannaata Qimussersuanut anngunniunnermi angutinut ajugaanikuunini qamuuna nukittussutiginikuuaa. Tamannami ima oqaluttuassartaqarpoq:
- Meeraallunga angummit kinguaassiutitigut atornerlugaanikuuvunga, perorninnili aalajangernikuuvunga angutinut nukersorneq atunngikkaluarlugu arlaannik akiniaaniarlunga.
- Taamani arnat ulluani qimussimi unammilluta arnartatuaallunga angutit tamarmik tununniittoralugit apuuteqqaarama, meeraallunga misigisapilunnut ajugaasutut misiginikuuvunga.
Rita Inûsugtok ataatami qimmiata piaraanik inersimasunngornikunik 2012-imi qimmitaarpoq, aappaagunnguinnartorli Avannaata Qimussersuanut peqataarngaarpoq.
AAMMA ATUARUK Rita Inûsugtoq sukkanniunnissaminut piareerpoq
Rita Inûsugtok marloriarluni Avannaata Qimussersuanut unammeqataanikuuvoq. Taanna nunatta oqaluttuarisaanerani arnani siullersaalluni unammersuarnermi peqataaqqaarpoq.
Qimussertaleqqaarnini ima oqaluttuaraa:
- Meeraagallarama imermik kuuginnartumik imeqanngikkallaratta qimusserniutigiinnarlugu ataatama qimmii atorlugit qimussikkut imertartarnikuuvunga.
Taassuma arnat angutillu naligiittut isigineqarnissaat pingaartittarpaa. Taamaammallu naamineerluni angutit suliarinerusartagaanut soorlu qimussernermut, aalisarnermut allanullu sapinnginnii takutissallugu nuannarisarpaa.
- Angutit suliarisartagai arnanut unammillernarnerusinnaasarnerat miserratissaanngilaq, pingaartumik nukersornartut, kisianni uanga aporfiginagit takutinniartarpakka, tassami arnaagaluarutta angutaagaluaruttaluunniit assigiinnik suliaqarsinnaagatta.