Rita Avannaata Qimussersuanut

Avannaata Qimussersuata oqaluttuarisaanerani aatsaat siullerpaamik arnamik peqataasoqartussanngorpoq. Ikerasaarsummiu 28-nik ukiulik Rita Inûsugtok Kangaatsiami ullumi anngunniunnermi siullersaalluni tikippoq, taamaalilluni Avannaata Qimussersuanut, Ilulissani marsip 23-ani ingerlanneqartussamut, unammeqataasussanut ilannguppoq.
marsip 01-at 2013 12:36

Rita Inûsugtok-ip anngunniunnerminni 40 kilometerit qulinik qimmeqarluni 1 tiimi 9 minutsillu atorlugit ingerlaarfigaa:

- Nuanneq. Aqqutaa tamaat aallarninniit tassa siulliuvunga. Taamaallaat kaajallaguffimmi apussarinnikkoorama ataatsip saneqqukkaluaraanga manngertukkoorlunga sanioqquteqqippara. Aqqutaa tamapajaat siulliuvunga, Rita Inusugtok nuannaaqisoq taama oqarpoq. Ingerlaarnertik tamangajaat Rita Inusugtok siulliuvoq, aqqutaanilu pissanganartorsiorsimavoq:

- Tassa ataaseq qanittuaraangami qimmii nuisarlutik. Apisimagami aamma. Sanioqqunnialermat eqqissisimaniaannarlunga ingerlaarujoorpunga.

Kangaatsiamit Avannaata Qimussersuanut annguttut allat tassaapput Ado Sandgreen, Isak Siegstad, Gert Frederiksen aamma Jens Inusugtok.

Kangaatsiami anngunniuttut saniatigut Qasigiannguani aamma ualeq manna anngunniuttoqarpoq. Qasigiannguaniit anngupput:  Malik Samuelsen, Ove Johansen, Saamu Villadsen, Malik Johansen aamma Malik Jeremiassen.

Avannaata Qimussersuanut Qeqertarsuarmi, Ilulissani Sisimiuni Ilulissallu nunaqarfiani Qeqertarmi aamma aqagu anngunniuttoqassaaq. Tasiilami arfininngorpat tulliani anngunniuttoqassaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq