Qummoroortartut juullikkunni tillitaanngitsut
Kommunimi sulisut Nuummi Nuup Imiup tunuani containereqarfiup imaarneqarnerani containerit assigiinngitsut tallimat qummoroortartunik tonsialunnik oqimaassuseqartut nassaaraat.
Tamanna soorunami inerteqqutaavoq taamaammat politiit suliamut ilanngunneqartariaqarsimapput. Politiit qummoroortartunik piginnittoq ilisimallugu, KNR-imut ilisimatitsipput. Suliamulli tunngatillugu ilisimasaminnik allanik paasissutisseerusunngillat.
AAMMA ATUARUK Qummoroortartut inerteqqutaasumik toqqortarineqartut tonsit arlalissuit Nuummi nassaarineqartut
Qummoroortartorpassuilli siorna juullip ukiortaallu akornanni tillinneqartut, 1,5 tonsiusut matumani suliamut attuumassuteqannginnerarpaat.
Siorna pisumi Qinngorpumi containereqarfimmit qummoraartartut tillinneqarput. Ullut arlaqanngitsut qaangiummata qummoroortartut 700 kiiluusut Nuussuup ilaani, inissiat eqqaanni nassaarineqarput. Suliami tassani inuit marluk tigusarineqarput.
