Qummoroortartut inerteqqutaasumik toqqortarineqartut tonsit arlalissuit Nuummi nassaarineqartut
Kommuneqarfik Sermersooq nittartakkamini taama allaaserisaqarpoq.
Containeri ataaseq qummoroortartunik tonsinik arlalissuarnik imaqarpoq, containerillu allat marluk qummoroortartunik amerlasuunik aamma imaqarlutik.
Qummoroortartunik nassaartoqarnera Kommuneqarfik Sermersuup ilungersunarluinnartutut isigaa:
- Qummoroortartut taama annertutigisut sumiiffimmi inunnik sulisunik aammalumi innuttaasunut annertuumik navianartorsiortitsipput. Ikuallattoqalissagaluarpat qummoroortartut annertuumik qaartoorutaasinnaapput, Sanarfinermut Avatangiisinullu Ingerlatsivimmi immikkoortortami aqutsisoq Vilhelm Lynge Hard taama oqarpoq.
Kommuneqarfik Sermersooq Qinngutsinni containereqarfimmut nutaamut Isuliffimmut maanna nuussuileruttorpoq.
Tassani allamilu qummoroortartunik toqqortaateqarnissaq inerteqqutaavoq, tamanna innuttaasunut sanaartukkanullu sillimaniarnermut navianartorsiortitsisinnaammat, kommuni taama erseqqissaavoq.
Kommuneqarfik Sermersuup qummoroortartunik unioqqutitsilluni toqqortaateqarneq politiinut nalunaarutigereerpaa. Siunissami qummoroortartunik nassaartoqartillugu taakku aamma politiinut nalunaarutigineqartassapput, kommuni taama erseqqissaavoq.
