Qimmit peqarniitsumik toqutat Nuup eqqaani qimaannarneqartarput

Kommuneqarfik Sermersooq Nuummi innuttaasunit qimminik qitsunnillu pinngortitami toqunneqarlutik qimaannarneqarsimasunik naammattuuisimasunit qaammatit tamaasa arlaleriarluni saaffigineqartarpoq.
Allattoq Camilla Dam
decembarip 10-at 2015 16:20

Uumasut ilaat peqqarniitsumik toqunneqartarput qanoq anniartiginissaat naalliutsiginissaallu eqqarsaatiginagit, tamanna immini inerteqqutaaginnarani aamma ileqqorissaarnerunngilluinnarpoq.

- Ajoraluartumik qimmit toqunneqarsimasut arlallit naammattoorneqartarput nunaannarmi toqungasut piginnitsiminnit qimaannarneqarsimasunik.  Tamassuma nalinginnaajartuinnarnera alianartuuvoq.

- Uumasup toqunneqarnissaanik kissaateqartoqarpat taava uumasup sapinngisamik pitsaanerpaamik annernanngitsumillu toqunneqarnissaa siullertut iliuuserineqassaaq, taassuma saniatigut  uumasumik toqungasumik maanngaannaq qimatsinnginnissamik pisussaaffeqarpugut, Kommuneqarfik Sermersuumi uumasunik peqqissaasoq Madeleine Lind tusagassiutinut allappoq.

Aamma atuaruk Uumasut nakorsaata terianniat perlerortut mianersoqqussutigai

Uumasut toqungasut nappaatinik soorlu perlerornermik tuniluuttumik aallaaveqarsinnaaneri teriannissanullu aamma tunillaassisinnaaneri, taamaalillunilu illoqarfimmi inunnut ulorianartortitsisinnaaneri, oqartussanit mianersoqqussutigineqarpoq.

- Innuttaasut uumasumik toqungasumik naammattuuisut piaarnnerpaamik kommunimut attaveqassapput imaluunniit uumasut illersorneqarnissaannut inatsimmik unioqqutitsisoqarsimaneranut takussutissaqarpat politiinut attaveqassapput uumasoq tamaanngaanniit peerneqarniassammat.

Illup iluani uumasuutigisap toqunneqarnissaa kissaatigigaanni taassuminnga toqutsinerup pitsaanerpaamik aamma inatsisit naapertorlugit ingerlanneqarnissaa qulakkeertariaqarpoq. Qimmiutigisaq imaluunniit qitsuutigisaq nammineerluni aallaagaanni politiinit malittareqqusat naapertorlugit toqutsineq ingerlanneqassaaq taava uumasoq toqungasoq puumut ikillugu matoqqatillugu ikuallaavimmut tunniunneqassaaq.

Uumasumik toqutsineq qimitsinikkut, ipisitsinikkut imaluunniit nivinngaanikkut ingerlanneqartussaanngilaq aamma inerteqqutaavoq. Uumasumik aallartoorfiginnikkaanni uumasup erngerluni nassaarineqarluni toqunneqarnissaa qulakkeerneqassaaq imaluunniit toqunneqarnissaa siunertaralugu politiit attavigineqassapput.

Uumasunik peqqissaasup apeqqutit e-mailikkut nassiussat akisassavai: mlin@sermersooq.gl

Uumasuutigisap toqunneqarnissaa pillugu ikiorneqarnissaq kissaatigigaanni Donnas Dyreklinik aamma saaffigineqarsinnaavoq. Saaffiginninniaranni una atorneqassaaq e-mail: donnasdyreklinik@gmail.com imaluunniit oqarasuaatikkut: 381313.

Aamma atuaruk ASSIT Terianniaq perlerortoq umimmammik assiliisartunillu saassussisoq