ASSIT Terianniaq perlerortoq umimmammik assiliisartunillu saassussisoq
Umimmak sinittoq naammattooramikku assilisaalerpaat, taavali iteriasaarpoq qimaallunilu.
- Biilimut utilerluta umimmak qimaasorisarput takoqqipparput.
- Qaqqaq atuarlugu ingerlaarpoq, kukkullunili sangusoorpoq taamaalillunilu qaqqap sinaanut uniinnarluni.
- Umimmak meterinik 25-nik qanitsigalutigu assilisaaleruttoripput terianniaq umimmammik saassussisoq takulerparput. Terianniap takunngilaatigut. Malittuinnaq saassussivoq. Saassussinera sekundinik 25-nik sivisussuseqarunarpoq, taava tungitsinnut saassinnarluni tungiinnatsinnut aallarpoq uagullu paatsiveerutitallappugut Jensilu suaarpoq: ”Immaqaana perlerortoq pikunga ujarassuarmukariarta”, KNR-imut taama oqaluttuarput.
Piffissaq kingulleq qimaatippaat
Leon Rosengren Larsen ujaqqamik 2-3 kilomik nassaarpoq, kammalaataalu annilaarsimaqisoq qimaavoq
- Eqqarsarpunga uniussagukku isimminniarlugu. Meteriinnarmik qanitsigigaanga imeqqutaatigut milorarpara, taava tunuartilaariarlugu kaajallassinnarlugu qimaavoq, Leon Rosengren Larsen taama oqaluttuarpoq.
Taamaalilluni terianniaq kusanartoq napparsimasorli qimaatinneqarpoq, Leon Rosengren Larsenili Jens Christianssonilu pissanganartorsiorlutillu assilinik alutornartunik angerlaassaqarput.