Qimmit paatinneqartartut inerteqqutaalissapput

Qimmeqarnermut qitsuuteqarnermullu inatsit ukiortaamik atuutilersussamik sukaterneqarpoq. Sukarterineq pissutigalugu qimminik paatinneqartartunik peqarnissaq inerteqqutaalissaaq. Aamma qimmit kiisisarnerat sakkortunerusumik kinguneqartinneqartalissaaq.

Inatsisartut isumaqatigiillutik taperserpaat aalisarnermut, piniarnermut nunalerinermullu inatsisip allannguutissaatut siunnersuutaa pingasunngornermat inatsisartuni suliarineqartoq. Najuuttut tamarmik 23-iusut tapersersorpaat akerliusoqanngilarlu.

Qimmit taaneqartut imaluunniit taakkunannga akuneqarsimasut piginissaat ukiortaamiit inerteqqutaalissaaq:
1. Pittbull terrier
2. Tosa inu
3. Amerikansk staffordshire terrier
4. Fila brasileiro
5. Dogo argentino
6. Amerikansk bulldog
7. Boerboel
8. Kangal
9. Centralasiatisk ovtcharka
10. Kaukasisk ovtcharka
11. Sydrussisk ovtcharka
12. Tornjak
13. Sarplaninac

Upanninnineq kiisinerlu aamma sukateriffigineqassaaq. Inunnik uumasunilluunniit allanik kiiserujussuarsimasut ingerlaannaq toqunneqartalissapput. Politiit toqutsisuusassapput piginnittup akiligassaanik.

Qimminik taaneqartunik eqqusseqqusiunnaarneq ukiortaamiit atuutilissaaq.