Avannaata Qimussersua: Qimmeq qimuttoq toqunartutortinneqarluni toqusoq
Ukioq manna Avannaata Qimussersuaqarnerani ajortumik allamik pisoqarfiusimanera maanna paasineqarpoq.
Qimmermi teriarsuanut toqoraatitortinneqarluni toqusimavoq. Qimmimik piginnittoq Saqqarmiu William Jensen taama oqarpoq, pisorlu uumasut nakorsaannit uppernarsarneqarpoq.
William Jensenip qimmia teriarsuarnut toqoraatinik avannaata qimussersuani sukkaniunnissamut aqagunnerani, maannammut kinaassusersineqanngitsumit nerisinneqarsimavoq toqussutigisaminik.
Qimmeq teriarsuarnut toqunartumik nerisinneqarsimassasoq, uumasut nakorsaasa qimmip toqusup meriaava takoreerlugu ilimagilluinnarpaat.
AAMMA ATUARUK Avannaata Qimussersuani pissartaajunnaarsinneqartoq
- Uannut assut ajorpoq, sukkaniunnissaq taamatut qilanaarisimallugu sukkaniutereerama suna tamaat soqutiginagu pisussaannartut isigigakku, ajortoqartoq paasilerlugu assorujuk uangaalluni ajorpoq, William Jensen oqarpoq.
Qimussinnaajunnaartoq
Qimussimik sukkaniunneq aallartereersoq qimmeq toqunartutortinneqarsimasoq qimussinnaajunnaarpoq. Taamaammat William Jensenip aallaqqammerluni kipiinnartariaqarpaa. Avannaata Qimussersuani kingullersaalluni apuuppoq.
- Soqutigisaralugu assut ajorpoq, pingaartumik Avannaata Qimussersuani siorna 1-iugama illersuiniartussaavunga. Qimmima pitsaanerpaaffissaat anguniarsarinikuuara, William Jensen oqarpoq.
- Uumasut nakorsaqatinnut assi nassiuppara, taakkua nalunaarutaat naapertorlugit ilimanarluinnarpoq teriarsuarnut toqunartuusut, Sanne Wennerberg KNR-imut oqarpoq.
Kalaallit Nunaanni Qimussertartut Kattuffianni siulittaasup Naja Siegstadip taama pisoqarsimanera akuersaarneqarsinnaannginnerarpaa, tamannali pillugu siulersuisuunerit ataatsimeereerpata aatsaat itinerusumik oqaaseqarsinnaanerarluni.
- Nuanniitsorujussuuvoq taamatut pisoqarnera, aamma ilungersuummernarpoq taamaattoqallaqqunanngittaraluaqigami unammersuaarnerup nalaani, Naja Siegstad oqarpoq.
Nunatsinni politiit pisoq pillugu tusarsimanngillat suliassanngortitsisinnaanatillu, pisunilu taamaattuni qimmeqartoq nammineerluni unnerluussisussaasoq, taakkua erseqqissaapput.
AAMMA ATUARUK - Nuannersorujussuuvoq
Ajugaasoq kingullinngortitaasoq
Ukioq manna Avannaata Qimussersuaqarnerani aamma ajortumik allamik pisoqarpoq. Sukkaniuteqataasummi atsiornernik katersinerisigut qimussersuanngortoq kingullinngortinneqarpoq. Taanna aqqut alla atorlugu qaninnersiortoorsimavoq, taamaakkaluartorlu ajugaatinneqarluni.
Avannaatalu Qimussersuaqarneranit sapaatit akunnera qaangimmat Kalaallit Nunaanni Qimussertartut Kattuffiat aalajangerpoq ajugaasoq kingullersanngortinneqassasoq.
