Avannaata Qimussersuani pissartaajunnaarsinneqartoq

Avannaata Qimussersuani pissartatut ukioq manna suaarutigineqartoq, Frederik Mathiassen, inissisimaffimminit peersinneqarpoq. Kalaallit Nunaanni Qimussertartut Kattuffiat taama nalunaaruteqarpoq.

Allattoq Sara K. Jakobsen, Paninnguaq Steenholdt

apriilip 10-at 2019 06:16

- Takusinnaavarput malittarisassani uniuisoqarsimasoq, taamaalilluta naammagittaalliuut inaarutaasumik suliarivarput, malittarisassat aalajangiisoralugit. Taamaalilluni normu 1-iugaluarluni kingullinngortinneqarpoq, KNQK-mi siulittaasoq Naja Siegstad oqarpoq.

AAMMA ATUARUK Avannaata Qimussersuani Frederik Mathiassen Ilulissaneersoq ajugaasoq

Avannaata Qimussersua Qasigiannguani marsip 30-ani unammissutigineqarmat Ilulissaneersoq Frederik Mathiassen pissartatut suaarutigineqarpoq.

Silali erseqqarlummat ingerlaarfigeqqusaq avaqquttoorsimavaa.

Pissartaajunnaarsinneqartup Frederik Mathiassenip Qanoruumut taamani oqaatigigaluarpaa siullertut inissinneqarnissani qularutigisimallugu.

- Tikikkama soorunami nuannappugut assut. Kisianni uanga kammalaatikkalu eqqarsarpugut; qanorittoqassuamita?, Frederik Mathiassen oqarpoq.

Tamanna unammeqataasunit naammagittaalliutigineqarpoq, naammagittaalliuulli atorsinnaanngitsutut KNQK-mit nalilerneqarpoq.

Kisianni unammeqataasut aalajangiinermut akerliullutik atsiornernik katersatik kattuffimmut tunniuppaat suliarlu ataatsimiissutigineqaqqippoq.

Kattuffik ullumi nalunaarpoq suliaq naammaginanngitsumik suliarineqarsimasoq. Pissartatullu suaarutigisartik kingullertut maanna inissippaat.

- Suaarutiginninneq pereerpoq, suliassat tigoqqillugit soorunami ilungersunarpoq, siulittaasoq Naja Siegstad oqarpoq.

Frederik Mathiassen kingullertut inissinneqarmat, tulliulluni apuuttoq, Ville Siegstad, pissartanngortinneqarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.