Ville Siegstad ajugaanini pillugu: - Nuannersorujussuuvoq
Taassuma eqqortumik pineqarsinini nuannaarutigeqaa.
- Nuannersorujuuvoq. Nuannerpoq qajassuunnagu taamannak eqqortumik ingerlasimalluni, eqqortumillu ajugaatinneqarluni, ukioq manna 74-iliisussaq Ville Siegstad taamaalilluni Avannaata Qimussersuani ukioq manna 26-ssaat sukkanniuteqataavoq, sisamassaalu qimussersuanngorluni.
Avannaata Qimussersua Qasigiannguani marsip 30-ani unammissutigineqarmat Ilulissaneersoq Frederik Mathiassen pissartatut suaarutigineqarpoq.
Silali ersernerluttumi siullersaalluni illineqanngitsukkoornermini snescooterit aqqutigisimasaat atuallassimagai, naammagittaalliutigineqaraluartoq Frederik ajugaasutut suaarutigineqarpoq.
Sukkaniunnermi peqataasut ilaat sukkaniunnermi angusat naammagittaalliuutigaat.
Atsiortitsinernilu katerseriarlutik naammagittaalliuummik kattuffimmut allagaqarput.
Sapaatip akunnera ataaseq qaangiummat Kalaallit Nunaanni Qimussertartut Kattuffiata aalajangigaanik Frederik Mathiassen inissisimaffimminit peersinneqarpoq.
AAMMA ATUARUK Avannaata Qimussersuani pissartaajunnaarsinneqartoq
Avannaata Qimussesuani 26-riarluni ukioq manna sukkaniunermi peqataasoq, Ville Siegstad arlaleriarluni Qimussersuanngorluni pokalinnannikuuvoq. Taamaalilluni ukioq manna sisamassaat Qimussersuanngorpoq.
Frederik Mathiassen kingullertut inissinneqarmat, tulliulluni apuuttoq, Ville Siegstad, pissartanngortinneqarpoq.
