Qimmeq MIKI decembarip qaammataata qeqqata missaani Ilulissiassaaq, anngiortumik ikiaroornartunik eqqussukkanik naamaarluni misissuisartunngoriartorluni. MIKI qaammatinik sisamanik utoqqaassusilik, ulluni makkunani Fyn-ip avannaanni illoqarfimmi Morud-imi sungiusaleruttorpoq.
Piginnittussaata Tuperna Madsen-ip ilisarisimanerulernissartik siunertaralugu pulaarsimavaa. Qimmeq ikiaroornartunik misissuisartunngorluassaguni qunusuitsuussaaq, sapiitsuulluni alapernaatsuussallunilu. Nipiliortoqartillugu uipallertartussaanngilaq, naammagittartuussaaq utaqqisinnaassuseqartussaallunilu ilakkuminartuusussaasoq, områdeavisimi taama allaaserinnipput.
- MIKI ilinniartikkuminartuuvoq, ikiaroornartumillu HASH-imik nassaarsinnaanissaanik ilinniartikkini, MIKI-p sungiusaasua unnersiorpoq, ”siullermik hashimineq alersikumut ikillugu naamaartinneqartarpoq taava taamaalioreerutta sapernarsisikkiartuaartissavarput” sungiusaasoq Torben Skovhus oqaluttuarpoq.
Taanna aamma oqarpoq ukioq ataaseq affarlu qaangiuppat MIKI misilitseqqikkumaartoq.