Qimagutsinneqartut inissiartaartussanngortut
Innuttaasut arlallit Ineqarnermut Attaveqaqatigiinnermullu naalakkersuisoqarfimmit Uummannami aggustip ingerlanerani ataatsimeeqatigineqarput.
Inissianillu taartissanik qanoq ittunik Naalakkersuisut inoqutigiinnut ataasiakkaanut neqerooruteqarnersut innuttaasunut paasissutissiissutigineqarpoq.
Inissianik agguaassinissamut tunngavissat Naalakkersuisunit juunip qaammataani aalajangersarneqarput. Inissianik taartissanik innuttaasut, tassaarsuaqartoqarnerata nalaani Nuugaatsiami aamma Illorsuarni najugaqartutut inuit nalunaarsorsimaffianni nalunaarsorsimasut kisimik tunineqassasut aalajangersarneqarpoq.
AAMMA ATUARUK Qimagutitinneqartunut illut sanaartorneqalertut
Inissiamik attartortut inissiamik attartugassamik neqeroorfigineqarput, nunaqarfinni marluusuni inissiamik pigisaqartut illumik sanaqataaffiusussamik tunineqassapput innuttaasullu nunaqarfiit marluusut avataanni namminneerlutik inissiaateqareertut 50.000 koruuninik taarsiiffigineqassallutik.
Neqeroorummut akuersisut maannamut 33-iupput, pingasut itigartitsisimapput 18-illu naalakkersuisoqarfimmit suli oqaloqatigineqaratik.
AAMMA ATUARUK Nye boliger klar til jul næste år
Ineqarnermut Attaveqaqatigiinnermullu naalakkersuisoq Simon Simonsen nassuiaavoq tamat assigiimmik pineqarnissaat sapinngisamillu amerlanerpaat isumagineqarnissaat tunngavissatigut qulakkeerneqassasoq.
Aamma inissamik taartissamik neqeroorut taarsiiffigitinnertut isigineqassanngilaq, soorlu sillimmassiinernit tamanna ilisimaneqartoq.
- Tamatumanili inunnik ikiuiniarluni suliniuteqarneq pineqarpoq, tamatumani innuttaasut eqqugaasut inuunerminnik ingerlatitseqqinnissaannut ikiorneqarnissaat siunertarineqarluni, naalakkersuisoq allappoq.
