Qimagutitinneqartut Illut aappaagu juullertinnagu piariissasut
- Juullertinnagu piareernissaat anguniarluinnarparput. Tassa sapinngisarput tamaat atorlugu tassani piareerniassavagut, ineqarnermut naalakkersuisoqarfimmi immikkoortortaqarfimmi pisortaq Embla Kristjánsdóttir oqarpoq.
Karrani tassaarsuaq: Maanna susoqarpa?
Juunip 17-ani ajunaarnersuaq nunatta oqaluttuarisaanerani annersaraat.
KNR tassaarsuarmit eqqugaasut oqaloqatigiartorlugit novembarip qaammataani Uummannamiitsivoq.
Pisut oqaluttuarineri KNR-imi ulluni aggersuni malinnaavigikkit.
Nuugaatsiap Illorsuillu inui qimagutitinneqartut suli initaavinngillat.
Pisortat qimagutitinneqartut illuliuunnissaannut atugassanik 70 millionit koruuninik immikkoortitsereerput taassuumalu saniatigut 30 millionit koruunit danskit naalakkersuisuinit tapiissutigineqarlutik.
Aasaru sanaartortitsissasut
Illussaannilli aasaru aatsaat sanaartortitsilissapput.
Uummannami illussanut decembarimi sanaartorfissagissaalissallutik naatsorsuutigigitsik, pisortap oqaatigaa:
AAMMA ATUARUK Ineqarallartut initaavinnissamut utaqqisariaqartut
- Sanaartorfissagissaanissarlu aallartittariaqarpoq, taamaalilluta illuliassat siulliit umiarsuarmik siullermik juunimi tikinnissaannut piareersimaniassagatta.
Illut 25-50-it
Illussatut takorloorneqartut tassaapput Illorput 2021-mik taaneqartartut. Illuliassallu qasserpiaassanersut erseqqinnerusumik oqaatigisinnaanngilaa, taammaattorli illut 25-t 50-illu akornaniinnissaat naatsorsuutigaa.
Illuliassallu amerlammata assartornissaat pillugu Royal Arctic Line oqaloqatigineqareerpoq.
- Umiarsuit amerlanerusut tikissinnaaqqullugit RAL isumaqatigiissuteqarfigereerparput. Illuliassat tikisikkumallugit umiarsuit immaqa pilersaarutit saniatigut sisamariarlutik arfinileriarlutilluunniit tikinnisaat pisariaqartissavarput, ineqarnermut naalakkersuisoqarfimmi immikkoortortaqarfimmi pisortaq Embla Kristjánsdóttir oqarpoq.
Qimagutitinneqartut illussaannik sanaartortussat nunaqavissuunissaat aamma anguniaritsik, ineqarnermut naalakkersuisoqarfimmi immikkoortortaqarfimmi pisortap ilanngullugu KNR-imut oqaatigaa.