Ineqarallartut initaavinnissamut utaqqisariaqartut
Nuugaatsiap Illorsuillu inui qimagutitinneqaramik angerlarsimaffeerupput. Taamaammat Qaasuitsup Kommuniata taakkuninnga inissiigallarnissaq suli suliassaraa.
Tassaarsuaqarneraniillu qaammatit tallimat qaangiutereersut ilaqutariit 73-it inissinneqarallarsimapput.
Inigigallagaalli assigiinngeqaat.
Illut amigaataasut
Karrani tassaarsuaq: Maanna susoqarpa?
Juunip 17-ani ajunaarnersuaq nunatta oqaluttuarisaanerani annersaraat.
KNR tassaarsuarmit eqqugaasut oqaloqatigiartorlugit novembarip qaammataani Uummannamiitsivoq.
Pisut oqaluttuarineri KNR-imi ulluni aggersuni malinnaavigikkit.
- Sulinermi unammillernarnerpaajusimapput inissat. Manna inissatigut sanaartorfiunikuunngeriarmat illut amigaataasimapput, Qaasuitsup Kommuniata Uummannami aqutsisoqarfiani pisortaq, Makkak Markussen, oqarpoq.
Ilaqutariit 18-it Majoriap Uummannami ineqarfiini inissinneqarallarput, 26-it Uummannami namminneq illuutiminnut nuupput, ataaseq Uummannap timersortarfiani suli najugaqarallarpoq 24-illu Aasianniit Ukkusissanut illoqarfinni nunaqarfinnilu assigiinngitsuni maanna najugaqarlutik.
Ilaqutariilli tamarmik maanna oqqiffissaqaraluartut, qulit ukiup nutaap aallartitsinnagu inissinneqarallaqqitussaapput.
AAMMA ATUARUK Qaasuitsup Kommuniani sulisut uippakajaalersimasut
AAMMA ATUARUK Aappariit nutaamik initaarnissartik neriuutigaat
- Inissikkallarneqartussat immaqa pingasut sisamat kiserngoruppagut. Majoriap ineqarfii aamma atornikuuagut, taannalu ukiup naanerani inueruttussatut qullersaqarfimmiit piumasarineqarmat, ilimagaara tamaasa inissikkallarneri ukiup naanerani naammassissallutigit.
Aappariik Peter aamma Johanne Zeeb Uummannami illuaqqami inissiaasumi suli aaqqissugassaaqisumut nuukkallarsimasut pillugit KNR-imit ippassaq oqaluttuaraarput. Taakkulu inigigallakkaminni najugaqaannarnissartik pileriginngilaat.
- Massakkut ajorpianngilaq. Kisianni najutsiarlugu ajorpoq, anernilunnartorujussuuvoq. Oqoqarunarami nuanninngitsorsuuvoq, Nuugaatsiarmiu Peter Zeeb oqarpoq.
Aappariilli taakku qimagutitinneqarsimasullu allat nutaamik initaarnissartik utaqqissavaat.
Aasaru sanaartussasut
Pisortat qimagutitinneqartut illuliuunnissaannut atugassanik 70 millionit koruuninik immikkoortitsereerput, ukiormalli illunik sanaartorneq uninngavoq.
- Taassuma kingorna nutaanik illuliassanik tikisitsiortuinerit sanaartornerillu aallartittussaassapput. Qullersaqarfiup Namminersorlutillu Oqartussat ataanniitttup ineqarnermut Qullersaqqarfiup suleqatigiillutik taanna piareersarpaat, qimagutitinneqartut inissititerneqarallarnissaanik ataqatigiissaarisoq, Makkak Markussen, oqarpoq.