Qimagutitinneqartut Aappariit nutaamik initaarnissartik neriuutigaat
Illuarannguaq aappaluttoq qatsissumi inissisimavoq, isikkivigaalu kangerluk sikorasaartoq illoqarfiullu ilisarnaataa qaqqarsuaq Uummannaq.
Illup eqqaa perserpoq isseqaarlu. Illup tungaanut aqqut apummik ulissimavoq sukkut tamaanalu qaarsoqarasaarluni.
AAMMA ATUARUK Sakkortuvoq kisianni naammagittarniarsarivunga
Matu silarleq qaqortuuvoq Illumullu iseraanni torsuusaqarpoq mikisunnguamik naqqalu pappialamik qeratasuumik allungiartorfilerneqarsimavoq.
Karrani tassaarsuaq: Maanna susoqarpa?
Juunip 17-ani ajunaarnersuaq nunatta oqaluttuarisaanerani annersaraat.
KNR tassaarsuarmit eqqugaasut oqaloqatigiartorlugit novembarip qaammataani Uummannamiitsivoq.
Pisut oqaluttuarineri KNR-imi ulluni aggersuni malinnaavigikkit.
Talerpia tungaani perusuersartarfeqarpoq saamia tungaanilu atisanut nivinngaavik. Inimut ilorparteraanni oqaluppalaaq KNR raadiullu sapaatip akunnerata naanerani aallakaatitassiaa tusaaneqarsinnaapput, igalaalli suernerata kiassaatillu nipiliornerata radio qallerpaat.
Iikkamiipput pulaakkatta qitornaasa ernutaasalu kalaallisuulersorsimallutik assingi. Nuugaatsiap assinga taakkua akornanniippoq.
Ini suertoq
Peter aamma Johanne Zeeb nunaqarfimmi tassani juunip 17-ata tungaanut najugaqarput. Uummannalli qaqqaasa akornanni illuarannguami sivingasumiittumi maanna najugaqarallarput.
Illuli aaqqissugassaaqaaq. Persermi igalaatigut isaaginnavippoq.
- Soorunami ajuuilluni ajorpoq. Soorlumi asimi piniariartarfiit illui iserfigalugit. Iseqqaaratta ajornerujussuuvoq, aalisartoq Peter Zeeb oqarpoq.
Ulluinnarni aporfiit saniatigut Nuugaatsiami eqqaamasat taavalu aamma juunip 17-ani unnukkut qulinngoriartulernerani pisoq puigunngisaannartussaavaat.
- Nunagigakku soorunami angerlarsertarpunga, Peter Zeeb oqarpoq.
Inigigallagartilli maanna puullaaqissutiginerugaat, taassuma oqaatigaa.
- Allamik initaarnissarput utaqqerusaassavarput. Manna uagutsinnut aamma naleqqutinnginnami.
Ullulli nuannersortaqaqaat, Peter Zeeb oqarpoq:
- Nuannaartarpunga assut. Inuit ilassiortuarnerat assorujuk nakussatsittarpaanga.
AAMMA ATUARUK Inuussutissarsiornerput uninngavoq
Aappariilli neriuuteqarput. Inuunerisimasartik uterfigisinnaanngilaat siunissarli qaamavoq. Nutaamik illutaarunik immaqa qiianarmiuujunnaassapput.
- Nuugaatsiami assiliarinikuusagut isigisinnaaqqilerakkit angerlarserpallaarunnaarnikuuvunga. Soorlulimi uagutsinniilluta naak illu allaanerugaluaqisoq, Johanne Zeeb oqarpoq.
Peter Zeeb aalisariuteqaleqqikkuni aatsaat inuussutissarsiuleqqissinnaavoq. Nuliali Johanne Zeeb Atuarfik Edvard Krusemi maanna ilinniartitsisuuvoq.
