Illorsuarmiu: Inuussutissarsiornerput uninngavoq
Illorsuarni nunaqarfimmioqatigiinni ikioqatigiinneq ataatsimuualaartarnerillu ulluinnarsiutaagaluarput. Kiali ilimagaa nunaqarfik juunip ulluisa 18-anni qimanneqartussanngortoq.
- (Ilakka, aaqq.) qaqqamiittut, uagut umiatsiamiittugut, kalerrippaannga majuaqqullunga, sakkutuut umiarsuaat Illorsuit qanittuannut pereersoq. Oqarpunga sooq? Oqarput umiarsuarmunngooq ikaassorniaraatigut, Illorsuarmiu aalisartoq Pavia Zeeb oqarpoq, nangillunilu:
- Tassanngaanniit aatsaat paasivarput qimagutitinnialeraatigut. Nalullugulu sumut.
AAMMA ATUARUK Nuugaatsiap tassaarsuarmit eqqugaanera takuuk
AAMMA ATUARUK Inisseeqqinnissaq oqartussanit sulissutigineqartoq
Pavia Zeeb nulia, qitornaa ernutaalu Uummannamut qimagutitinneqarput tamaanilu suli najugaqarlutik. Illumi angisuumi inissinneqarallarsimapput tassanilu sivisuumik najugaqassallutik. Uummannamulli peqqaaramik illumiit illumut nooqattaaqqaarput.
Karrani tassaarsuaq: Maanna susoqarpa?
Juunip 17-ani ajunaarnersuaq nunatta oqaluttuarisaanerani annersaraat.
KNR tassaarsuarmit eqqugaasut oqaloqatigiartorlugit novembarip qaammataani Uummannamiitsivoq.
Pisut oqaluttuarineri KNR-imi ulluni aggersuni malinnaavigikkit.
- Taamatut atugaqarluni eqqissisimananngittorujuuvoq.
Nunaqarfiit inui qimagutitinneqartut aalisakkanik piniakkanillu inuussutissarsiuteqartuupput taavalu aamma pilisarlutik.
Nunaqarfitsik qimakkamikku annaasaqaqaat inuussutissarsiorniarnerallu ajornarnerulerpoq.
- Maanga qimagussortitaagatta inuussutissarsiornerput uninngavoq. Maanna isertitakka isertittakkannut naleqqiullugit affaannaavoq. Uangaannaanngilaq, aamma nunaqarfimmioqatikka maanga pissuunneqartut taamatut maanna inuuneqarunarput.
Illorsuarni imermik innaallagissamillu pilersuinerit septembarip ulluisa sisamaanni taamaatinneqarput. Nunaqarfiullu tunitsivia nutarterneqartoq aamma matuinnarneqarpoq.
AAMMA ATUARUK Qaasuitsup Kommuniani sulisut uippakajaalersimasut
AAMMA ATUARUK Qaqqaq alla sisooriaannaavoq
Taava nunaqarfik matuvoq.
- Fabrikki nutarterlugu, tigusinnaasai marloriaatinngorlugit, suliaralugu piariiliivissoq tassaarsuaqarmat matuneqarpoq.
Inuunertillu nutaaq pisumit alianartumit aallaaveqaraluartoq, Paviap pissutsit mumillugit nuannersunngortippai. Ilaquttani maanna qanippai.
- Aamma maaniileratta ernuttagut angajulliit ernutaqqiiutinnguarpullu Saattormiut imaalitsiarnerinnaanik tikissinnaallugit ullut tamangajaasa oqaloqatigisarpagut, Illorsuarmiu Pavia Zeeb oqarpoq.
