Illorsuarmiu: Sakkortuvoq kisianni naammagittarniarsarivunga
Benjamin Jonathansenip angerlarsimaffiani inimut iserluni pequtit nutaarsunnipput. Iikkani qaamasuni nivingasoqanngilaq ilisivimmilu nutaami allagartat ikittaallu kisimik saqqumipput.
Inissiami init anginersaat pequteqarpallaanngilaq akunnittarfimmilu inimit angerlarsimaffippalaannginnerulluni. Utaqqiisaasumik inissiaq Ilulissaniippoq inuunermullu nutaamut suli aallartilluarsimanngitsumut takussutissaalluarluni.
Karrani tassaarsuaq: Maanna susoqarpa?
Juunip 17-ani ajunaarnersuaq nunatta oqaluttuarisaanerani annersaraat.
KNR tassaarsuarmit eqqugaasut oqaloqatigiartorlugit novembarip qaammataani Uummannamiitsivoq.
Pisut oqaluttuarineri KNR-imi ulluni aggersuni malinnaavigikkit.
AAMMA ATUARUK Inuussutissarsiornerput uninngavoq
Inuunerup aallaqqaataaneernissaa ajornakusoorpoq tamatumunngalu peqatigitillugu inuunitoqqamit eqqaamasat initullutik.
- Artornaraluarpoq kisianni naammagittarlunga atorniarsarivara. Eqqissiviilliortorsuarmik pisariaqannginnatta, ilaannili qiasunngusaraluarpugut, Benjamin Jonathansen, juuni tikillugu Illorsuarni maskinmesteriusoq oqarpoq.
Illut uiguleriiaat qarsungasunik qalipaatillit ilaanni illumi sungaartumi maanna najugaqarpoq. Ernera 30-nik ukiulik Aqqaluartaaq Jonathansen, nalaasaarfiit ammit qernertut nutaat inimi inituupilussuit ilaanni angummi saniani issiavoq.
Tamarmik ajunngillat, illoqarfissuarmili avatangiisit allaanerupput. Illorsuarnimi innuttaasut 76-iupput Ilulissanilu innuttaasut 4500-t sinnerlugit.
- Ippinnalaaraluarpoq kisianni aaqqissaaq, Aqqaluartaaq Jonathansen Illorsuarni aalisartuullunilu kommunefogediusimasoq oqarpoq.
Ilulissanulli nuunnertik aamma ilaqutissartaqartoq, Aqqaluartaaq Jonathansen nangilluni oqarpoq.
- Maani qanigisaqarluni qatannguteqarlunilu iluartorujussuuvoq. Taavalu saniatigut inuit paasigaangamikku maanga nuukkallartugut tikilluaqqusisarput. Tuppallernaqaaq.
Taakku marluullutik maanna Ilulissani aalisartuullutillu piniartuupput. Ilulissanullu nuunnermik kingorna naammattumik ikiorneqarsimanerarput.
Benjamin Jonathansen aamma uteqqinnissaminik pilersaaruteqanngilaq.
- Sakkutooqarfimminngaanniit taamani paasitinneqarpugut (Illorsuarnnut, aaqq.) uteqqissanngitsugut. Orneqqinnissaalu eqqaanaveersaaginnarpara.
Aasaq ajunaarnersuaqarnerata kingorna avatangiisit atukkallu allanngorsimagaluartut inuttaat ileqquilu allanngorsimanngillat.
KNR-ip apersuinera naammassimmat nalaasaarfimmit nikuipput ileqqumisullu pisassatik suliariartorlugit. Imissaminnik nilattarniarput, soorlu tassaarsuaqanngikkallarmat aamma taamaattartut.
