Qimagutitinneqartunut illut sanaartorneqalertut
Uummannap kippasissortaani qaarsumi aqqusinniorput.
Illoqarfittaassaq siorna junip 17-ani tassaarsuaqarneranit pisariaqalersimammat, illuliorfigineqassaaq.
Kommunimi ingerlatsinermi akisussaasuugallartoq biilimit aqqusinermit sioraasumiit niuvoq nunaminerlu ruujorissanik ilioraaffigineqarsimasoq tikkuarlugu.
Qimagutitinneqarsimasut illussaat tamaani sanaartorneqassapput.
- Illorsuarmiut Nuugaatsiarmiullu illussaasa toqqavissaat sumiiffissaat titartarneqarnikuupput taavalu kallerup inneranut aqqutit suliarineqarlutik, kuuffiit erngullu aqqutaa sukkoorfissaat nalunaarsorneqarlutik titartarneqarnikuupput, Kaaleeraq Grønvold oqarpoq.
AAMMA ATUARUK Qimagutitinneqartut amerlanerit suliffeqarput
Aqutsisoqarfimmi pisortaq Makkak Markussen kommunip allaffianiippoq. Taassuma Uummannami nunap assinga tikkuarpaa.
Illoqarfittaassamiit Uummannap qaqqaa ersissaaq, allaaqqitsillugulu kimmut qiviaraanni Qaarsut takuneqarsinnaassaaq.
- Nunagissaasoqareerlunilu aqqusinniortoqareerpoq. Sanaartortoqartussaavoq aamma nalunngilara sanaartugassat umiarsuakkut tikittussaasut kisianni qassiuneri suli naluarput.
Aqutsisoqarfimmi pisortaq naapertorlugu kommuni illoqarfiup iluani toqqavikuni illunik nutaanik aamma sanaartortitserusuppoq.
AAMMA ATUARUK Ataqatigiilluarunnaartut
AAMMA ATUARUK Qimagussortinneqarsimasut ajunaarnersuaqarnera puigunngilaat
- Kisianni aamma apeqqutaavoq Namminersorlutik Oqartussat akueriniarneraat, tasakku illuliortussaagamik. Kisianni siunnersuutit nassiunneqareernikuupput.
Naalakkersuisoqarfik illorpassuarnillu akikinnerpaamik sanaartorusuttut isumaqatigiinnialeruttorput.
Pilersaarut malillugu aasaq manna sanaartulissasut, ineqarnermut naalakkersuisoqarfimmi immikkoortortaqarfimmi pisortaq Embla Kristjánsdóttir KNR-imut mailikkut allappoq.
Palle Jeremiassenilli KNR-imut arfininngornermi oqaatigaa sulisukinneq pissutigalugu sanaartorneq kinguaattoorfiusoq.
Illorput 2021-mik taaneqartartut illuliarineqassapput. Taakku Illorput 2000-it assigiinnarpaat, nutartigaallutik.