Qimagutitinneqartut: Ataqatigiilluarunnaartut
Karrat Kangerluanni tassaarsuup nunaqarfimmi inuit, qimmit, illut atortullu allat siorna amuai nunaqarfiillu marluk matuneqarput.
Nunaqarfimmiut ataqatigiinnerat kingorna tammariartulerpoq. Tamannalu Illorsuarni Nuugaatsiamilu nunaqarfinni aqutsisuni siulittaasup aamma maluginiarsimavaa.
Karl Peter Møller, Illorsuarni Nuugaatsiamilu nunaqarfinni aqutsisuni siulittaasoq.
AAMMA ATUARUK Ukiumik ataasinngortorsiornermi Uummannami pisussanut pilersaarutit
- Isumaqarpunga tammartoq. Aamma nunaqarfimmiuulluni illoqarfimmut periataarluni pisut ersippiannginnamik arajutsisaratsigit ilaatigut, Nugaatsiameersoq Karl-Peter Møller oqarpoq.
Nuugaatsiami 100-t missaannik innuttaqartumit Uummannamut 1200-nik innuttaqartumut nuunnerup kingorna ataqatigiinnerup allanngorsimanera Johanne Zeebip oqaatigaa.
AAMMA ATUARUK Uummannarmiut katerisimaarnissartik pisariaqartippaat
- Nunaqqatigisimasagut iluamik takorpiartanngilagut, taamaallaat qaqutigut aqqusinermi, immaqaluunniit pisiniarfimmi naapillattaaginnartarpagut, Nugaatsiameersoq Johanne Zeeb oqarpoq.
Illorsuarmiut amerlanerpaartaat Uummannamut nuupput nunaqarfimmiullu ataqatigiilluarsimagaluartut maanna takussaajunnaarsimavoq.
Soorlu ataatsimoortitsiniarluni aggersaasarniarnerigaluit iluatsinngitsoortarsimasut, Erik Møller oqarpoq.
AAMMA ATUARUK Tarnit pissusaanik ilisimasallit piareersimassasut
- Avissaangangaatsiarpugut maani illoqarfimmi, katersoruminaattorujussuullutillu. Soorlu ataatsimuualaartitsiniarnernik aaqqissuiniarnerni ikittuaqqat takkussuuttarput.
Erik Møller taama oqarpoq, tamannalu Johanne Zeebimit uggorineqarpoq:
- Nuanninngikkaluarpoq taamannak avissaaqqanersuaq.
