Tassaarsuaq: Ukiumik ataasinngortorsiornermi Uummannami pisussanut pilersaarutit
Karrat Kangerluani tassaarsuaqarneranit ukiup ataatsip qaangiunneranik malunnartitsinissaq Uummannap oqaluffiani sapaatiuppat ullaap tungaani eqqaaniaalluni naalagiaqatigiinnermik aallartinneqassaaq.
Naalakkersuisut siulittaasuat Kim Kielsen, ineqarnermut attaveqaqatigiinnermullu naalakkersuisoq Simon Simonsen Avannaata Kommunianilu borgmesteri Palle Jeremiassen peqataassapput.
Eqqaaniaalluni naalagiaqatigiinnerup kingorna iliveqarfinnut marlunnut ingerlaaqatigiisapput, tassani Nuugaatsiami ajunaartut sisamat eqqaassutissaanni nigaliliisoqassaaq.
AAMMA ATUARUK Naalakkersuisut aamma Avannaata Kommunia tikeraalersut
Ullup-qeqqata missaani kaffillertoqassaaq erinarsoqatigiillu Uummannameersut Erinaq erinarsussallutik.
Kalaallit Røde Korsiat ualikkut grillerissaaq illoqarfimmiunullu tamanut nuannisaartitsissalluni. Nuugaatsiami Illorsuarmilu innuttaasut katersortarfitoqqamut unnukkut qaaqquneqarput.
Karrat Kangerluani tassaarsuaqarneranit – ukiup ataatsip kingorna
Nunatta oqaluttuarisaani pinngortitami ajunaarnersuaqarnerni sakkortunerpaat ilaat siorna juunip 17-ianni pivoq.
Ajunaarnersuaqarneranik nalaataqartut ilaat oqaloqatiginiarlugit KNR Uummannamiippoq.
KNR-ip aallakaatitsineri ulluni tulliuttuni malinnaavigikkit.
Naalakkersuisut Avannaata Kommunialu ataatsimoorlutik Nuugaatsiami Illorsuarmilu innuttaasunut arfininngorneq ukiumik ataasinngortorsiornissamut ulloq ataaseq sioqqullugu ataatsimiititsissapput. Ataatsimiinneq Edvard Krusep atuarfiata eqaarsaartarfiani nalunaaqutaq 15.00 pissaaq, tassanilu Kim Kielsen, Simon Simonsen Palle Jeremiassenilu peqataassapput.