Paasisat nutaat: Qilalukkat qernertat qimaatitaanertik toqqutigisinnaagaat
Ilisimatuut qilalukkat qernertat nunatsinniittut misissuiffigisimavaat, qilalukkallu qernertap sukkasuumik qimaanermini uummataata tillernera sukkatsinneq-ajortoq paasisimallugu.
- Taamaattoqarneratigut qilalukkap qernertap nukik annertuupilussuaq atortarpaa taamaalillunilu timimi atortui pingaarluinnartut, soorlu uummatini qaratsanilu navianartorsiortittarpai, Naalagaaffiup Uumassusilerinermik Katersugaasivia tusagassiorfinnut nalunaaruteqarluni taama allappoq.
Ilisimatuut paasisat nutaat tunngavigalugit isumaqarput arferit nipermiuutinneqarlutik toquinnarsimasut tamanna toqqutigisimasinnaagaat.
Qilalukkat tallimat misissuiffigigaat
Ilisimatuut nunatsinni qilalukkat qernertat tallimat uummatip tillerneranut uuttuutinik pilersorlugit misissuiffigisimavaat, uuttuutillu taakku ullut pingasut qaangiunnerini nammineq katapput. Uuttuutit katersorneqarput paasissutissallu nalunaarsorneqartut ilisimatuunit misissoqqissaarneqarlutik.
- Qilalukkat qernertat aqqaamanermi qaratsap uummatillu iltimik pilersornissaat qulakkeerniarlugu uummatip tillernerata sakkukillisarnera qimaariarnerminni atuinnartarpaat, naak taamatut periartaanerminni ilti nukiminnut pisariaqartikkaluarlugu, Mads Peter Heide-Jørgensen taama oqarpoq. Taanna ilisimatusaammik allaaserinnittuuvoq Naalagaaffiullu Uumassusilerinermik Katersugaasiviani, Københavnip Universitetiani Pinngortitaleriffimmilu professoriulluni.
Ilisimatusaat ilisimatuunit nunanit tamalaaneersunit ingerlanneqarpoq, ilaatigut Naalagaaffiup Uumassusilerinermik Katersugaasivianit, Københavnip Universitetianit Pinngortitaleriffimmiillu peqataaffigineqarluni. Ilisimatusaammi angusat ilisimatuussutsikkut atuagassiami Sciencemi saqqummersinneqarput.
