Qilalukkat kingusinnerusukkut kujavartalersut
Qilalukkammi Tjuktiit imartaaniittut ukiaanerani kujavartarnertik 1990-ikkut aallartinneranut naleqqiullugu qaammammik ataatsimik kinguartissimagaat misissuinerup nutaap takutippaa.
Aviisi Alaska Dispatch News taama ilaatigut allaaserisaqarpoq.
Issittup Imartaata kingusinnerusukkut sikusalernera, immallu kissatsikkiartornera pissutaalluni qilalukkat qaqortat Manerassuarmi nassaassaasut ingerlaartarnertik allanngortikkiartoraat, University of Washingtonip misissuinerata takutippaa, inernerillu atuagassiami Global Change Biologymi aamma saqqummersinneqarlutik.
Tjuktiit Imartaata ukiuunerani sikuusarnerata 1979-imiilli ataatsimut isigalugu ullunik 80-inik sivikillisimanera misissuinermi allami aamma allaaserineqarpoq Global Change Biologymilu aamma saqqummersinneqarsimalluni.
