Qeqqata Kommuniata suliffeqarfimmini pujortartarneq unitsinniaraa
Qeqqata Kommuniata suliffeqarfiini, paaqqinniffiini suliffeqarfinnilu allani maajip aallaqqaataanit pujortartoqartarunnaassaaq.
Kommunalbestyrelsimimi amerlanerussuteqartut kommunip suliffeqarfiini tamani ulloq taanna aallarnerfigalugu pujortartoqartarunnaarnissaa aalajangerpaat. Kommuni tusagassiuutinut nalunaarummi taama paasissutissiivoq.
Taamaammat kommunimi atorfillit suliffimminniikkaangamik pujortaqqusaasaruunnaassapput.
Kommunimi meeqqat atuarfianni atuartut peqqissisusaat, toqqissisimanerat peqqissusertillu pillugu pissusilersuutigisartagaat pillugu misissuinermi siorna peqataavoq. Tassanngalu kisitsisit pujortartarnermut atatillugu aalerinartoqarnera takutippaat.
Meeqqat 7. aamma 8. klassimi atuartut quliugaangata ataaseq pujortartartoq aamma 9. aamma 10. klassimi atuartut pingasuugaangata ataaseq pujortartartoq, ilisimatuussutsikkut misissuinerup, Health Behaviour in School-aged Childrenimik (HBSC) taaguuteqartup takutippaa.
Meeqqat pillugit pujortartoqartarunnaassasoq
Pujortartarneq meeqqat akornanni pujortartartut amerlassusaat pingaarnertut pissutigalugu unitsinniarneqartoq, borgmesteri, Malik Berthelsen (S) oqarpoq.
- Uanga qularinngilluinnarpara meerartatsinnut ikiuussinnaanerput annerpaaq tassaammat inersimasut meeqqanut maligassiuinerat, borgmesteri tusagassiuutinut nalunaarummi oqarpoq.
AAMMA ATUARUK Qeqqata Kommuniani 10. klassit: Pingasunit ataaseq ulluinnarni pujortartarpoq
- Taamaammat iluarisimaarpara politikkikkut suleqatigiit Siumut, Inuit Ataqatigiit Atassullu isumaqatigiissumminni siunniunnikuummassuk Qeqqata Kommuniata 1. maj 2022 aallarnerfigalugu pujortarfiujunnaartinneqarnissaa, Malik Berthelsen oqarpoq.
Malittarisassat inuit ilaasa killissamik qaangiinertut nalilersinnaagaat borgmesterip nassuerutigaa. Borgmesterilli oqarnera naapertorlugu tamanna pisariaqarpoq.
AAMMA ATUARUK Rygeforbud kan sprede sig
- Aalajangernerput immaqa ilaannit naalagaaniarnertut isigineqarsinnaagaluartoq, matumani peqqissutsitta illersorneqarnissaa pineqarmat, neriuppunga assortuussutiginatigu tamatta ikioqatigiissutigissagipput.
- Takorluulaariartigumi kommunitsinni innuttaasut nunatsinni tupamik atuinnginnerpaanissaat angusinnaagutsigu qanoq tulluusimaarnartigissanersoq, borgmester Malik Berthelsen oqarpoq
Kommuni pujortarnerup inerteqqutigineqalerneranut atatillugu atorfeqartut pujortarunnaarnissaanut ikiuiniarpoq. Assersuutigalugu pujortarunnaarnissamut siunnersuisoqarnera atorneqarsinnaavoq.