Qeqqata Kommuniani 10. klassit: Pingasunit ataaseq ulluinnarni pujortartarpoq
Qeqqata Kommuniani 10. Klassimi atuartut pingasuugaangata ataaseq ulluinnarni pujortartarpoq.
Tamanna kommunip apersuinermik misissuinerata takutippaa.
9. klassimi atuartut sisamaagaangata ataseq ulluinnarni pujortartarpoq.
10. klassimilu atuartunit qulinit ataaseq hashimik pujortarneq misilissimavaa.
10. klassimi atuartunit pingasunit ataatsip aalakoorneq ataasiaannarnani aamma misilissimavaa.
Assi: Qeqqata Kommunia.
Kisitsisitit qaffasinnerat pissutigalugu Qeqqata Kommunia Sisimiuni Maniitsumilu angajoqqaanut unnoqartitsinermut aggersaavoq.
Angajoqqaat 5. klassimit 10. klassimut atuartuutillit januaarip ulluisa 20-at 21-allu aggerlutik misissuineq pillugu annerusumik tusagaqarsinnaapput.
Tamanna Maniitsumi ullumi aallartinneqassaaq. Sisimiuni angajoqqaat sisamanngornermi aggersarneqarput.
Nunatsinni pujortartarneq
52 procentit ulluinnarni pujortartarput.
Nukappiaqqat/angutit 15-init 24-nut ukiullit 58 procentii ullut tamaasa pujortartarput. Niviarsiaqqat/arnat 52 procentii ullut tamaasa pujortartarput.
25-nit 34-nut ukiullit 57 procentii ullut tamaasa pujortartarput.
Arnat 35-nit 59-nut ukiullit 53 procentii ullut tamaasa pujortartarput. Angutit 55 procentii ullut tamaasa pujortartarput.
Utoqqaanerusuni angutit 41 procentii ullut tamaasa pujortartarput. Arnani 44 procentii pujortartarlutik.
Paasissutissarsiffik: Kalaallit Nunaanni Innuttaasunik misissuineq 2018.
Angajoqqaat meeqqami peqqissusaannut atugarissaarnerannullu sunniuteqarnissaat siunertaavoq.
Angajoqqaat oqaloqatigiissasut
Apersuinermik misissuinermi inernerit angajoqqaanut ataatsimiitsitsinermi saqqummiunneqassapput. Kommunip tamatuma kingorna suliniutit atuartut peqqinnanngitsumik ileqqoqarunnaarnissaannut ikiuutaasussat saqqummiutissavai.
Oqallittoqassallunilu.
- Meeqqat pitsaasumik ingerlalluarfigisaat, kiisalu meeqqat ulluinnarni nukittuneruffigisassaatut angajoqqaat isumaqarfigisaat eqqartorneqassapput, kommuni tusagassiuutinut nalunaarummi allappoq.
Corona pissutigalugu killilersuinerit pissutaallutik meeqqat klassii aallaavigalugit aaqqissuunneqassaaq.
5.-6. klassit: nal. 16:30-19:00
7.-8. klassit: nal. 17:15-19:45
9.-10. klassit: nal. 18:00-20:30
Kommunip oqarnera naapertorlugu unnuup ingerlanerani unnukkorsiuteqartitsisoqassaaq.
- Tamanna pissutigalugu peqataanissamik nalunaarneq piumasarivarput. Atuarfimmiit meeqqat peqataanissamut nalunaarfissamik angerlaassissaaq, immersoriarlugu klasselærimut tunniunneqartussamik, Qeqqata Kommunia allappoq.
Aaqqissuussineq atuarfiit, Qeqqata Kommunia, Paarisa aamma Kalaallit Nunaanni innuttaasut peqqissusaannik ilisimatusarfiup suleqatigiinneratigut aaqqissuunneqarpoq.
Aaqqissuussinerit assingusut kommunip nunaqarfiini ukiup ingerlanerani aaqqissuunneqarumaarput.
