Martha Lund Olsen Qeqqata Kommuniani isumaginninnermi marsip aallaqqaataani 2022 pisortanngorpoq. Kommuni meeqqamik atugarliortumik ikorfartuinermik suliani suut isumakulunnarnerannik naliliisinnaasunik, tassa ilinniarsimasunik, sulisussaalatsisoq, taanna oqarpoq.

Qeqqata Kommuniata kukkusarsimanerminik isornartorsiorneqarnini akigaa

Qeqqata Kommuniata meeqqamik atugarliortumik ikorfartuinermik suliami ilungersunaqisunik qasseeriarluni kukkusarsimanera, Ombudsmandip isornartorsiorpaa. Kommunilu maanna akivoq.

Akuerineqarsinnaanngilaq, eqeersimaanngippallaarneruvoq ilatsiinnarnerullunilu.  

Qeqqata Kommuniani meeqqamik atugarliortumik ikorfartuinermik suliaq, Inatsisartut Ombudsmandiata taama inernilerpaa. 

Suliaq naatsumik:

 

Meeraq taanna atugarliortoq Qeqqata Kommunianut arfineq-pingasoriarluni nalunaarutigineqarsimavoq, taakkualu 2017-imi novembarip arfineq-pingajuata 2020-milu maajip 14-iata akornanni pisimapput.

 

Meeraq taanna qulingiluaannarnik ukioqartoq suliaq aallartissimavoq.

Assersuutigalugu meeraq taanna eqqarsartaatsikkut ineriartornermigut kinguariaateqarsimasoq, tarnip pissusiinik ilisimasallip nalunaarutigisimavaa. Aamma imminornissamik eqqarsaateqartartoq imminullu innarlertartoq, nakorsaanerit ilaata kommunimut aamma nalunaarutigisimavaa.

Tassa isumaginninnikkut misissuinissamut tunngavissaqarnersoq, kommunip siullermilli nalunaaruteqartoqareernerani nalilersimasariaqaraluarpaa.

Meeqqanimmi tapersuisarneq pillugu inatsit naapertorlugu kommuni nalunaarfigineqarnerminiit nalunaaquttap akunneri 24-t qaangiutsinnagit isumaginninnikkut misissuinissamut tunngavissaqarnersoq isummertussaavoq.

Kommunili taamaaliorsimanngilaq, taamaammat inatsisinik meeqqat inuusuttullu tapersersorneqarnissamik neqeroorfigineqarnissaannik qulakkeerutaasussanik unioqqutitsilluinnarsimavoq.

 

Tassa kommuni meeqqanik tapersersuisarneq pillugu inatsimmik suliassallu suliarineqartarnerat pillugu inatsimmik unioqqutitsisimasoq, ombudsmandi inerniliivoq.

Qeqqata Kommuniata tamanna maanna akivaa.

- Sivisuumik suliarinerlutaasimavoq, isumaginninnermi pisortaq Martha Lund Olsen KNR-imut oqarpoq.

Tassa taassuma ombudsmandip kommuni suliami tassani ilaatigut naammanngitsumik iliuuseqarsimaneraaneranut isumaqataavoq.

Kommuni ilinniarsimasunik sulisussaalatsisoq

Tamanna kommunip ilinniarsimasunik isumaginninnermi siunnersortissaalatsineranik peqquteqartoq, Martha Lund Olsen oqarpoq.

- Suliaq taanna ilarussuunnertaliusoq isumaginninnermi siunnersortitut ilinniarsimasuunngitsunut erloqinartuuvoq, taanna oqarpoq.

Kommunilu suliat assingusut sapangeqqikkumanagit qanoq iliussanersoq aperineqarami, amerlanerusunik sulisoqalerrneq akissutaatippaa.

- Isumaginninnermi siunnersortitut ilinniarsimasunik sineriammi sulisussarsiorneq ukiuni kingullerni ajornarneruleraluttuinnarpoq, Martha Lund Olsen oqarpoq nangillunilu:

- Sulisoqarnerulerusuppugut. Atorfiit arlallit inuttaqanngillat isumaginninnermilu siunnersortitut ilinniarsimasunik arlalinnik ukioq manna sulisussarsiorpugut, qinnuteqartoqaranili.

Kommunimimi sapinngisamik pitsaanerpaamik suliarinninniartarlutik, isumaginninnermi pisortaq erseqqissaavoq.

- Iliuuseqartoqarsimanngitsoq oqarsinnaanngilanga. Sapinngisamik suliarineqarpoq. Peqqissaarunneqarsimanersorlu oqallisigineqarsinnaavoq.

- Nalunaartoqarpat suliami tassani suut isumakulunnarnerannik naliliisinnaasunik sulisussaqannginneq peqqutaalluni, qanoq iliornissaq ajornakusoortarpoq, taanna oqarpoq.

Nassuiaatai isornartorsiummut attuumassuteqanngitsut

Kommunilli taama patsisissarsiuuteqarnera assuarnartuusoq, Ombudsmandeqarfiup inatsisilerinermi pisortaa Kim Blokbo isumaqarpoq.

- Pisortap akisussaasuusup tamanna sulisussaalatsinermik patsiseqarnerarlugu oqarnera naammaginanngilaq, taanna oqarpoq.

Kommunimmi sulisussaalatsinermik sulianik sivisunaarussisarnernut patsiseqartarnerat, taassumunnga tusarnartaanngilaq.

- Kommunit sulisussaalatseqisut qularnanngilaq. Qeqqata Kommuniatali nassuiaatai ombudsmandip isornartorsiutaanut attuumassuteqanngillat.

Inunnik ikiuineq pillugu malittarisassat tunngavigalugit Qeqqata Kommunia isornartorsiorneqartoq, inatsisilerinermi pisortaq nassuiaavoq.

- Nalunaartoqarpat kommunip tassanngaanniit nalunaaquttap akunneri 24-t qaangiutsinnagit iliuuseqartussaatitaanera eqqaassagaanni ukiut sisamangajaat qaangiutereerneranni suli iliuuseqarsimannginnini sulisussaaleqinerinnarmik peqquteqarnerarlugu nassuiaateqarnera isornarpoq, taanna oqarpoq.

- Qanormi iliortoqassagami?

Suliaq taanna qanoq suliarineqassanersoq kommunip nalugaa, isumaginninnermi pisortaq Martha Lund Olsen oqarpoq.

- Qanormi iliortoqassagami? Nunatsinni meeqqanut tarnikkut nappaatilinnut immikkoortortaqarfeqanngilaq, taakkualu amigaatigeqaavut. Meeqqanimmi inissiiffissaqanngingajappoq, taanna oqarpoq.

Suliap taassuma erloqinartuunera nunatsinni meeqqanut tarnikkut nappaatilinnut immikkoortortaqarfeqannginneranik peqquteqartoq, taanna oqarpoq.

- Soorunami iliuuseqajaartoqarsimasariaqaraluarpoq. Qanorpiarliuna iliortoqarsimasinnaagaluartoq? Danmarkimi nunamiluunniit allami pisimagaluarpat, meeraq taanna meeqqanut tarnikkut napparsimasunut immikkoortortaqarfimmi misissugassanngortinneqarsimassagaluarpoq.

Kommuni ilaginnaasoq

Kommunilli qanorpiaq iliorsimasinnaagaluarneranik Martha Olsenip apeqqutaa akineqanngilaq.

Tamannalu kommunip meeqqamik taassumalu arnaanik ilaginnaaneranik kinguneqarpoq.

- Kommunip meeqqap taassuma arnaata pisariaqartitaanik ilitsersuisimannginnera meeqqap arnaatalu pisinnaatitaaffiangaangaatsiarnerannik kinguneqartoq, ombudsmandi Vera Leth allappoq.

Kommunimi ikorfartuissutaasunik iliuuseqassanerluni isumaginninnikkulluunniit misissuissanerluni aalangersimanngilaq.

- Meeqqanimmi tapersersuisarneq pillugu inatsit naapertorlugu kommunip pisinnaasuni taakkunani marlunni pinngitsoorani suliassaqarpoq. Taamaaliorsimannginnerali ilaginnaalluinnarneruvoq, inatsisilerinermi pisortaq Kim Blokbo oqarpoq.

Kommunip suliassaraluaminik ilumut naammassinnissinaannginnersoq nassuerutiginerusunnerlugu Martha Lund Olsen aperineqarami akissuteqarumanngilaq.

Allaffisisornikkummi aaqqissuussaaneq suliap taassuma tassunga killinneranut peqqutaasoq, taanna oqarpoq.

- Isumaginnittoqarfimmi suleqatikka suliani assigiinngitsuni sapinngisartik tamaat ulapputtut nalunngilara. Qanorluunniit pisoqaraangat tamatigorluinnangajak tapersersortarpakka.

- Kukkusoqaraangat naammaginninngittoqarpat paasisinnaavara. Ullumikkulli pissutsit taamaatsillugit taama pisoqarpoq, taanna oqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl