Qeqqata Kommuniata aappaagumut aningaasartorfissani inissippai
Kommunimi aningaasaatigut sukannersumik aqukkatsigit aningaasartuutit isertitallu oqimaaqatigiikkaluarput, kisianni Namminersorlutik Oqartussat suliffeqarfiutiminnik kommunitsinniit Nuummut nussuimmata, kommunip aningaasaqarnera ajorsiartorpoq, borgmester Hermann Berthelsen KNR-imut oqarpoq.
- Assersuutigiinnarlugu siusinnerusukkut Sulisa, Greenland Venture, Maniitsumiissimagaluartoq Nuummut nuussimavoq. Nutserisunngorniat Ilinniarfianni ilinniarnerit assigiinngitsut Nuummut nuuneqarsimapput.
- Kangerlussuarmi timmisartunik mitsitsisarnermut tunngassuteqartut Naviairiminngaanneersut aamma Nuummut nuussimapput, Siumumeersoq Hermann Berthelsen naammagittaallioqisoq taama oqarpoq.
Kommunilu suliffinnik annaasaqaraangat innuttaasullu pisisinnaassusikinneruleraangata, tamanna akileraarutitigut isertitassaagaluit annaaneqartartut, taamaalillunilu atukkatigut assigiinnginneq annerulersillugu nunatsinni aningaasaqarneq tamaat equngalersittaraa, Hermann Berthelsen oqarpoq.
- Pisiniartartut pisisinnaassusiata minnerulerneranik tamanna kinguneqassaaq, taavalu akileraarutitigut isertitavut soorunami minnerulissallutik.
- Tassalu annilanngatigivarput, ukiuni makkunani Nunatsinni tamatta akilersukkavut amerlavallaartut Qeqqata komunianeersuinnaaanngitsut kommuninit allaneersut aamma Nuummut nuuttarnerat, Hermann Berthelsen KNR-imut oqarpoq.
