Qeqqata Kommuniani timersorneq siuarsarniaraat
Inuiaqatigiinni kikkut tamat peqqinnarnerusumik inuuneqalernissaannut ataatsimoortitsinissaq aqqutissiuussinissarlu isumaqatigiissusiornermi siunertaavoq.
- Sunngiffimminni namminneq kajumissutsiminnik sulilluartorpassuaqarpugut. Timersornermi namminneq kajumissutsiminnik sulisut pikkorissartuarnissaat, amerlanerusullu kajumilersinneqartuarnissaat uagutsinnut pingaaruteqarpoq, GIF-imi siulersuisuni ilaasortaq John Thorsen taama oqarpoq.
Suliffeqarfinni peqqinneq isumaqatigiissummi ilaavoq, kommunillu suliffeqarfippassuini peqqinnerulersitsinissamik kommunimi inuummarissaasut suliaminnit ingerlatsiinnarnissaannut GIF-imik suleqateqarneq aqqutissiuusseqataassaaq.
Atornerluisoqartarnerata ataatsimoorullugu akiorniaraat
Timersornikkut suleqatigiinnerup saniatigut imigassanik ikiaroornartumillu atornerluinerit kiisalu peqatigiiffinni kinguaassiutitigut kanngutsaatsuliortarnerit ataatsimoortumik akiorniarneqassasut isumaqatigiissutigineqarpoq.
- Kommunimi timersornerup siuarsarneqarnissaa, amerlanerusullu timersortalernissamik soqutiginnilersinneqarnissaat pillugit suleqatigiinneq nuannareqaara, kisianni pingaartumik imigassanik ikiaroornartumillu atornerluinerit pinaveersaartinneqarnissaannut kiisalu peqatigiiffinni kinguaassiutitigut kanngutsaatsuliortarnerit unitsinneqarnissaannut suleqatigiissinnaanerput nuannaarutigeqaara, Qeqqata Kommuniani borgmesteri Malik Berthelsen tusagassiorfinnut nalunaarummi taama oqarpoq.
