Qeqqata Kommunia sipaarnialertoq
Qeqqata Kommuniani sipaarniartoqassagaluarpalluunniit kommuni aappaagu 19,6 millionit koruuninik amigartooruteqarnissaa aamma siunnersuutaavoq. Qeqqata Kommuniata aappaagu 645 millionit aningaasartuutigissavai.
- Oqaatigisinnaanngilarput qasseqqissaat sipaarneqassanersut sumilu aaneqassanersut, Qeqqata Kommuniani borgmesteri Hermann Berthelsen oqarpoq.
Sipaarniutillu piviusunngussappata innuttaasunut sunniutinngitsoornavianngillat.
Kommunip kiffartuussineri akiliuteqarfiusartut, soorlu meeqqeriviit assigisaallu, akitsuiffigineqarnissaat siunnersuutaavoq.
Aamma meeqqat atuarfiini sipaarniartoqassaaq. Klassini ataasiakkaani atuartut amerlissapput, klassit taamaalillutik ikiliniassammata. Tassumalu saniatigut immikkut atuartitsinerit ikilisarniarneqarput.
Kommunip allaffeqarfiani atorfinitsitseqqusiunnaarnissaq aamma aalajangiiffigisassat ilagaat. Kommunimi sulisut suliaasa annertusinerisigut, sulisut ataasiakkaat atorluarneqarnissaat aamma eqqartugassat ilagaat.
Suli qularnartoq
Qeqqata Kommuniani aappaagumut missingersuutit kommunalbestyrelsip ullumi septembarip 25-ani siullermeerlugit oqaluuserissavai. Oktobarillu naanerani aatsaat paasinarsissaaq sumi sipaartoqassanersoq akinillu qaffaasoqassanersoq.
- Tassani takuneqarsinnaalissaaq sipaartoqassanersoq akiliutigineqartartullu assigiinngitsut soorlu meeqqerivinnut, eqqaaveqarnernut allarpassuarnullu qaffanneqassanersut, aammalu akileraarut ullumikkut 26 procentiusoq allanngussanersoq, Hermann Berthelsen oqarpoq.
Qeqqata Kommuniata aningaasaqarnera ajornartorsioraluartoq siunissaa taartuinnaanngilaq.
- Qeqqata Kommunia qujanartumik maannamut suli aningaasanik taarsigassarsinikuunngilaq. Taamaammat sanaartugassat, innarluutilinnut utoqqarnullu inissiat eqqarsaatigalugit, taakkua sanaartornissaannut aningaasalersuinissamut taarsigassarsinissaq eqqarsaatigisinnaavarput periarfissaq taanna atornikuunnginnatsigu, Hermann Berthelsen oqarpoq.