Naluttarfiliorniarneq ingerlaqqippoq: 1 million koruunit aningaasaliissutigineqarput
Qeqqata Kommuniani kommunalbestyrelsep tamarmi isumaqatigiissup sapaatip akunnera kingulleq sisamanngornermi borgmester Malik Berthelsen pisinnaaffilerpaat Sisimiuni Maniitsumilu naluttarfiliornissap sulissutigeqqinnissaanut. Suliniut 150 millioner koruunit missaliorlugit akeqassaaq aningaasallu taakku suli maannamut qulakkeerneqanngillat.
Isumaliutigisassat arlallit ataatsimiinnermi oqaluuserineqarput. Tamakku ilagaat naluttarfissat timersortarfiillu kikkunnit pigineqarnissaat.
AAMMA ATUARUK Maniitsumi naluttarfik ukiut tallimat qaangiuppata
- Sisimiuni Maniitsumilu timersortarfiit suliffeqarfiupput imminnut pigisut. Maanna pisinnaatitaaffilerneqarpunga taakku siunissami qanoq piginnittoqarnissaasa misissornissaannut. Periarfissat ilagisinnaavaat maanna kulturip illorsuani Taseralimmi atugarput, kommune illutaanik piginnittuummat kulturillu illorsua illumik attartortuulluni, Malik Berthelsen nassuiaavoq.
Tulleriiaarineq
Naammassiniagassaq annertooq tassaavoq sanaartugassap 150 millioner koruunit missaliorlugit akeqartussap aningaasassarsinissaa.
- Aningaasaliissutit 1 million koruunit ilaatigut atorneqassapput illussanik titartaasartunik unammisitsinermut. Ilanngullugu piumasaqaataavoq illussanik titartaasartut peqataaniartut uppernarsarsinnaassagaat aningaasaateqarfinnik suleqateqarnermi misilittakkat. Tassami sanaartugassat piviusunngortinneqalerpata avataaniit aningaasaliisinnaasunik pissarsiortoqartussaavoq, Malik Berthelsen oqarpoq.
Suli qularnarpoq naluttarfiit marluusut ataatsikkut sananeqarsinnaanissaat.
- Tulleriiaarineq pisariaqalersinnaavoq. Qeqqata Kommuniani sanaartornermut aningaasaliissutit ukiumut katillugit 130 millioner koruuniusarput. Taamaattumik takorlooruminaatsippara sanaartugassap 150 millioner koruunit missaannik akeqartussap ataatsikkut suliarineqarsinnaanissaa, Malik Berthelsen oqarpoq.
Qeqqata Kommuniani kommunalbestyrelse aamma aalajangerpoq Sisimiuni Maniitsumilu timersortarfiit nutarterneqassasut maanna naluttarfiliornissaq iluatsillugu. Taamaasilluni pinngitsoorniarneqarpoq illup uiguleriit pitsaassutsimikkut annertuumik assigiinngissusillit pilersinneqannginnissaat.
