Maniitsumi naluttarfik ukiut tallimat qaangiuppata
Ukiut qulikkaat pingasut toquusaqqareerluni peqatigiiffik Maniitsumi Naluttarfik, inunnit 35-t missaaniit peqataaffigineqarluni sapaatip akunnerata siuliani uummarteqqinneqarpoq. Nalunaaquttallu akunneri pingasut missaanni uummaarissumik oqallinnermi naluttarfittaassap titartagartaanik saqqummiisoqarpoqi, aammalu peqatigiiffiusimasup aningaasaqarniarnera saqqummiunneqarluni.
- Maannamut aningaasat 1,5 millioner koruunit aningaasaatigaavut, siulersuisuusimasullu sulilluartarsimanerisa tassa kinguneri, peqatigiiffik sinnerlugu Wilhelm Josefsen knr.gl-mut oqarpoq.
Peqatigiiffik Maniitsumi Naluttarfik 1970-kkunni pilersinneqarsimavoq, ukiullu 20-t matuma siorna unittoorsimalluni. Arlaleriarlunilu aallarteqqinniarneqartarsimagaluarpoq, sapaatillu akunnerata siuliani inuit 35-t peqataasoralugit peqatigiiffik aallarteqqinneqarluni.
Titartaasarfiup Masantip naluttarfik 1.100 kvadratmeterisut angissuseqartussaq, 30 millioner koruuninillu naleqarumaartussaq titartarsimavaa. Naluttarfiullu inissisimaffissaa unnummi tassani eqqartorneqarsimavoq.
Inissiivissatut piukkunnaateqarnerpaat marluk aalajangiunneqarput, siullertut Annertusumi Qallunaat Iliveqarfiannik taaneqartartoq piukkunnaatilittut eqqaaneqarluni, aappaattullu aalisakkeriviup talittarfiani, qanga fiskemiililiorfiusimasoq.
Peqatigiiffik neriuppoq naluttarfissaq ukiut tallimat iluanni sanaartorneqarluni piareerneqarsinnaajumaartoq. Aningaasartuutaajumaartullu 30 millioner koruuniusut, aningaasaateqarfinniit assigiinngitsunit inunninngaanniillu aningaasaliiffigineqarlutik matussuserneqarumaartut neriuutigineqarpoq.
