Qeqqata Kommuniani misileraaviliornissamut neriulluartut
Nunaqarfik mittarfilik siusinnerusukkut biilinut misileraaveqarsimavoq, taamaattumik Qeqqata Kommuniani neriulluarput.
- Eqqartorparput maanna ukiuunerani piviusungorsinnaasoq, Qeqqata Kommuniani kommunaldirektørimut tullersortaasoq Laust Løgstrup KNR-imut oqarpoq.
Ukiunnerani biilinik misileraavissatut Kangerlussuaq naleqquteqaaq, tamaani sila nalerittuummat.
Aamma atuaruk Kangerlussuaq biilinik misileraavittut atoqqinneqalersoq
Taamaattumik nunaqarfiup mittarfillip iluaqutigisinnaavaa biililiortartut arlallit misileraavissaminnik ujaarlernerat, maannakkummi misileraaviusut biililiortartut piumasaqaataannut naapertuutinngimmata.
- Sverigimi klimap allanngoriartorneranik eqqorneqartupilussuupput ukiuusarnerami sivikilliartuinnarpoq, Laust Løgstrup oqarpoq.
Biililiortartunik Kangerlussuarmut misileraajartoqqusipput
Arjeplog Test ukioq manna siusinnerusukkut isumaqatigiissuteqavinnissaq pillugu isumaqatigineqarallarsimavoq, taanna Sverigimi Kinamilu misileraaveqareerpoq.
Isumaqatigiissutip imaraa Arjeplog Test Managementip biililiortartunik Kangerlussuarmi misileraarusuttunik pissarsiussasoq.
Aamma atuaruk Borgmesteri isumalluartoq
Misileraavik atoqqileriaannaavoq, Laust Løgstrup naapertorlugu nunaqarfiup aqquserngi pioreersut biilinullu inissiisarfiit atorneqarsimasut atoqqileriaannaapput, tyskimmi biililiorfiata volkswagenip tamakku Kangerlussuarmi misileraaveqarallarami atorsimavai.
- Iluaqutaa uaniippoq suliffeqarfiit arlaat aallartikkuni periarfissat pioreersut ilaatigut mittarfeqarfimmut atasut atoriaannaammata, Laust Løgstrup oqarpoq.
Misileraaviliornissaq misissorneqartareerpoq
Volkswagenip misileraavini 2004-imi matuaa, kingornalu allat pilersaaruteqartarsimagaluarput nunaqarfimmi biilinik misileraasalerniarlutik.
BMW siorna misissuigaluarpoq Kangerlussuarmi misileraaviliorniarluni, taamaatiinnarsimallunili isseqannginnerata nalaani misileraasassamaarsimagaluarami.
Kisianni maannakkut iluatsinnissaanut Laust Løgstrup neriulluartorujussuuvoq.
- Periarfissaq una malersussuarput, piviusorpalaarpormi biililiorfiit arlallit soqutiginnimmata. Volkwagini maaniinnikuuvoq, 1999-imiillu 2004-mut misileraaveqarsimalluni. Una asuleernerunngilaq, soqutigineqarpormi, Løgstrup naggasiivoq.
