Qeqertarsuarmi nuna sajuttoq
Ullaassaq nalunaaqutaq sisamanngunngitsiartoq Richerip uuttuutaani 4,4-mik sakkortutigisumik uuttorneqartumik Qeqertarsuarmit 19 kilometerisut kujasitsigisumi immap iluani sajuppoq. Nunap sajunnera 25 kilometerisut ititigisumiittutut uuttorneqarpoq.
Tamanna Danmarkimi Kalaallit Nunaannilu nunap qanoq issusianik misissuiffimmit, GEUS-imit nunap najunneranik suliaqartup, ilisimatuunerup, Trine Dahl-Jensenip uppernarsarpaa.
- Nunap sajunnera Kalaallit Nunaannut annertungaatsiarpoq, kisianni nunap sajunnera taama annertutigisut ukiut arlaleriarluta takusarpagut. Sumiiffimmi tassani nuna aamma taama annertutigisumik sajoreernikuuvoq, taanna oqarpoq, nangillunilu:
- 2016-imi taama sakkortutigisunik pingasoriarluni sajunnikuuvoq, kingornalu annikinnerusumik najulluni, taamaammat sumiiffimmi tassani nunap najuttarnera ilisimavarput. Kisianni taama sakkortussuseqartut annertunatillu uloriananngillat.
GEUS-ip annertunngitsumik kingorna sajuppillanneq aamma nalunaarsorsimagaa, Trine Dahl-Jensenip paasissutissiissutigaa.
Politiit innuttaasunit nalunaarfigineqarsimanngitsut, Kalaallit Nunaanni Politiit pigaartuisa pisortaat, Peter Bauer KNR-imut oqarpoq.
