Qeqertaaqqap aaqqiagiinngissutaasup eqqaani Filippinerit Kina inatsisaatsuliorneraraat

Kinap kujataata imartami qeqertaaqqami aaqqiagiinngissutaasumi filippinerit angallatiminnik marlunnik sakkutuutik nerisassaannik marlunngormat pajunniaraat, Kinamiut sinerissami nakkutilliisut sakkortuumik imermik tissaluttaatinik saassuppaat.

Filippinerini naalakkersuisut sisamanngornermi taamatut nalunaarput.

Qeqertaaqqap Thomasip, Filippinerit namminneq Ayungin-imik taasagaata eqqaani taamatut pisoqarnerani inunnik ajoqusertoqanngilaq. Filippinerilli angallataat pajunniartut utiinnartariaqarsimappput.

Filippinerit nunanut alanut ministeriat, Teodoro Locsin, sisamanngornermi taamatut oqaluttuarpoq.

- Taassuma nalunaarummini Kinamiut sinerissami nakkutilliisut iliuusaat inatsisaatsuliornertut taavai.

- Sumiiffinni tamakkunani Kina inatsisit naapertorlugit iliuuseqaqqusaanngilaq. Kina mianersortariaqarpoq sakkutuunilu tunuartillugit.

Nunanut allanut ministeri nangilluni oqarpoq, Filipinerit naalakkersuisuisa pisimasoq pillugu mamiatsannertik, assuarlernertik akerliunertillu Kinamiut aallartitaannut nunanullu allanut ministereqarfiannut nalunaarutigaat.

- Filippinerit USA-llu illersornissamut isumaqatigiissutaanni  Kinami pisortat angallataasa qanillattunnginnissaasa ilanngunneqarnikuunerat Kinamut eqqaasitsissutigaara, taanna oqarpoq.

Taassuma innersuussutigaa, Filippinerit USA-llu isumaqatigiissutaanni Filippinerit avataaniit aarlerisaarneqassatillugit USA-p ikiuinissaminut pisussaaffeqarnera.

Qeqertaaraq Ayungin Filipinerit immikkoortortaata Palawan-ip kitaaniippoq, nunallu aningaasaqarnikkut immikkut killeqarfiata iluaniilluni.

Filippinerit sakkutuuisa umiarsuaat asiulluinnartoq 1999imili ikkarlikkami tassani kisaqqanikuuvoq.

Umiarsuaq, "BRP Sierra Madre", tassaniisinneqaannarnikuuvoq, sumiiffimmi Filippinerit piginnittuunerat malunnartinniarlugu.

Sakkutuut umiarsuaata taassuma tamaanngaanniit peerneqarnissaa Kinap arlaleriarluni piumasarisarnikuuaa.

Sumiiffik tamanna nunarsuatsinni assortuussutaanerpaat ilagaat. Kinap kujataata imartaata annersaanik Kinamiut namminneq piginnittutut piumasaqaateqaraluartut, Filippinerit, Brunei, Malaysia, Taiwan kiisalu Vietnam ukiuni qulikkaani arlalinni tamanna assortornikuuaat.

USAp aamma nunat tamakkua namminneq killeqarfimmittut piumasaqaataat illersorlugu tamatumunnga isumaqataavoq.