Qassutit amuneqanngitsut akornutaasut
Aalisartulli qassutaarsortarneq takornartarinngilaat.
-Annertungaatsiarput qassutaarsiutit ningittangaarsiutillu, Aalisartoq Upernaviup eqqaani Aappilattumeersoq Hans Thomassen KNR-imut oqarpoq.
AAMMA ATUARUK Bedre fiskeri betyder færre sælskind
Pinngortitaq pillugu nunarsuaq tamakkerlugu suliniaqatigiiffiup nalunaarsugaani Danmarkip imartaani qassutit kataasimasat ikigisassaanngillat. Norgemi aalisartut aalisaatiminnik annaasaqarsimatillutik oqartussanut nalunaaruteqartartut, danskit taamaaliorneq ajorput.
Nunatsinnilumi aamma tamanna ajornartorsiutaavoq.
- Ningittakkereqatitsinnut ilisimatitsisarpugut. Sumi ningittangaarsersimanerluni qanorittuuneriluni. Ilaasa amusarpaat inuttaanullu utertillugit, Hans Thomassen oqarpoq. Ningittagaarsernermili pisortat kalerrinneq ajoritik, taassuma nassuerutigaa.
Nalunaarsorneqanngillat
Nunatta imartaani qassutit amuneqanngitsut qanoq amerlatiginersut nalunaarsorneqanngillat.
Qaasuitsup Kommuniata 2013-imi 2014-imilu qassutit amuneqarsimanngitsut sumiinnerannik nalunaarsuiffimmik illoqarfinni allaffinnut agguaavoq. Allaffiilli pingasuinnaalli akisimapput.
- Katersoriarlugit pilersaarusiorsinnaagatsigit aalisarfiusuni sumerpiaq saliinissaq. Kisianni akissutit taama ikitsigitillugit aallaaviusinnaannginnamik, Inuussutissarsiornermut siunnersorti Paviaraq Jakobsen oqarpoq.
AAMMA ATUARUK Aalisartut pissarsiakippallaarput
Iliuuseqarfiginiarneqarpoq
Neriuutissaqarporli.
Qassutimmi imaaniittut qanoq akornutaatigineri misissuiffigineqartussanngorpoq. Nunatsinni Ilisimatusarnermik Siunnersuisoqatigiivianit 60.000 koruuninik aningaasaliiffigisaanik Pinngortitaleriffiup tamanna misissortussanngorpaa.
Københavnimimi augustusip qaammataani isumasioqatigiittoqassaaq, qassutit qaqinngitsuukkat qanoq ajornartorsiutaatiginerat qanorlu iliuuseqarfigineqarsinnaanerat oqaluuseralugit.
AAMMA ATUARUK Qaasuitsumi qassusersorluni qaleralinniarneq sivitsorneqartoq
12.07.17. Naqqiut: Nunatsinni Ilisimatusarnermik Siunnersuisoqatigiit 60.000 koruuninik aningaasaliipput. Aallaaserisap naqqinneqanngikkallarmat millioniuneraraluaripput.
