Qaasuitsumi qassusersorluni qaleralinniarneq sivitsorneqartoq
Qaleralinnik qassusersorluni aalisarnerup sivitsorneqarnissaa Qaasuitsup Kommuniata aalajangiuppaa.
Allattoq Sara K. Jakobsen
maajip 01-at 2017 11:53
Ukioq manna sikuunerujussuata kingunerisaanik qassutinik aalisartoqarsinnaasimannginnera pissutaalluni aalisartut sivitsuinissamik kissaateqarput.
Qassusersorluni qaleralinniarneq apriilip ulluisa 30-anut killeqarnissaa aalajangersarneqarnikuugaluarpoq.
Sivitsorneqarnissaali Piniarnermut Aalisarnermullu Ataatsimiititaliap kommunalbestyrelsimut innersuussutigaa, tassalu qassusersorluni maajip ulluisa 31-ata tungaanut qaleralinniartoqarsinnaalerluni.
Aalisarnermut Piniarnermullu naalakkersuisoq Karl Kristian Kruse ileqqoreqqusamik allannguinermik tapersiivoq.
Maajilli 31-ata tungaanut qassusersorluni qaleralinniartoqarsinnaalissappat, kommunimi ileqqoreqqusamit immikkut ittumik akuersissuteqarnissaq pisariaqarpoq.
