Great Greenland: Puisit amii amigaatigilersinnaavagut

Kisitsisinit Nunatta naatsorsueqqissaartarfianeersunit puisit amiinik tunisisarnermut tunngasuni takuneqasinnaavoq, nunatta kitaani puisit amii tunisat ikiligaluttuinnartut.

- Aalisarneq annertoorujussuanngornikuuvoq, kitaa eqqarsaatigissagaanni saarulliit takkussimaarnerat taavalu piffiit ilaanni qaleraleqalersimanera taanna uagutsinnut malunnartorujussuuvoq. Ammit tunisaanerat appariarsimanerannut ukiuni kingullerni, Qaqortumi Great Greenlandimi tunisassiornermi pisortaq Preben Møller taama oqarpoq.

Kujataani Kitaani puisit amii 2013-imi 44.000-it missaanniittut tunineqarput. Taakkuali siorna affaannai tunineqarsimallutik tassa 23.000-it missingi.

Tamannali suliffeqarfimmut unammillernartortaqartoq taassuma aamma oqaatigaa.

- Taamatut ingerlaannassagutta tassa pisariaqarluinnarpoq amernik aggiussisoqarnissaa maannga suliffeqarfitsinnut, Preben Møller taama oqarpoq.

Puisit amii kitaani tunisat ikiligaluttuinnartut, tunumi kujataanilu Narsami amerliartorput. 
Puisit amii Tasiilami nunaqarfittaanilu 2013-imi tunineqarsimasut 6000-it missaaniipput. Siorna tunisat 10.000-iullutik.

 - Annerpaamik tunumi Tasiilap eqqaani inuutissarsiutip suli annersarigallarpaat immaqa piniartuuneq, Great Greenlandimi Qaqortumiittumi tunisassiornermi pisortaq Preben Møller Marie Kuitse Kristensenimut taama oqarpoq.