VIDEO Qasigiannguani tunisassiorfiup sulisuisa sinniisaat misissueqqusivoq

Taama inissittoqarnera aqutsinerlunnermiissinnaavoq sulinermilu pissutsit pillugit misissuisoqarnissaa sinniisumit maanna ujartorneqalerpoq.

Qasigiannguani fabrikkimi sulisut holdit ataatsit 40-sussaagaluarlutik 20-t missaannaanniillutik ulluni makkunani sulisarput.

- Taanna eqqartorparput, soorunalimi, uagut sinniisutut aamma nalilerparput aqutsinerluttoqarmat aamma suleqatigiit akornanni taama oqalupput. Arlaatigut aaqqiisoqartariaqarpoq, Royal Greenlandimi sulisut sinniisaat, Gaba Rosbach KNR-imut oqarpoq.

Aamma atuaruk Ikioqatigiilluta aaqqiissutissamik ujartuisariaqarpugut

Aqutsinerlunnerlu ima ilaatigut nalilerneqarpoq:

- Ikilisaasoqaleraangat ajoraluartumik sulilluartunut allaat piaartaramikkit, taavalu tassani sulerusussuseq aamma soorunalimi annikillissooq taamatut pineqarnermi, Gaba Rosbach oqarpoq.

Sulisussaaleqineq ilaatigut qalerallit 2,5 tonsit igiinnartariaqarsimaneranit kinguneqarpoq. Pissutsinillu suliffiup iluani pisunik qulaajaasoqartariaqalersoq sinniisut isumaqarput.

Aamma atuaruk VIDEO Qasigiannguani Royal Greenland sulisussaaleqivoq

- Tassa aqutsisut maani Qasigiannguani qulaajaaffigineqartariaqalerput, sinniisuniit taamatut isumaqarpugut, Gaba Rosbach oqarpoq.

Royal Greenlandimi qullersat Qasigiannguani sulisut sinniisaasa piumasaqarnerat tusaatissatut tiguaat.

- Tusaatissatut tigussuarput. Kisianni immikkut ittumik soorlu oqareertunga aallartitsinianngilagut misissuinermik. Soorunami qanimut malinnaaffigissavarput Qasigiannguani tunisassiorfik, sulisullu aqutsisullu, aamma attaveqarnermut annikillinavianngilaq siunissami, Søren Olsen Damgaard Royal Greenlandimit KNR-imut taama oqaaseqarpoq.

Aamma atuaruk Qasigiannguit: Sulisussaaleqiffiusumi suliffissaaleqisorpassuit