Qasigiannguani tunisassiorfimmi ajornartorsiutit anigorniarlugit ataatsimiititaliortoqarpoq

Royal Greenlandip Qasiagiannguani tunisassiorfiani sulisoqarniarnikkut ajornartorsiuteqaqisoq tusagassiutitigut qaammat kingullermi sammineqaqaaq.

Ajornartorsiutit anigorniarlugit suliffeqarfissuarmeersut, sulisut aamma Qaasuitsup Kommunianeersut ataatsimiititaliussallutik isumaqatigiipput.

Sulisulli ilaasa suliartunngitsuukulanerat ajornartosiutinut qitiusoq, Royal Greenlandip tunisassiornermut pisortaa, Jens K. Lyberth oqarpoq, tamannalu ataatasimiititaliami sulinermi qitiussaaq.

Aamma atuaruk Qasigiannguani Royal Greenland sulisussaaleqivoq

- Qasigiannguani fabrikki ingerlaannassappat aalisartullu tunisisarnerat ingerlaannassappat qanoq ilillutik ikioqatigeqatigiillutik  tamakkua aqqutssiorsinaanerlugit ataatsimiititaliami oqaloqatigiissutigissavaat

Jens K. Lyberth taama oqarpoq

Qaasuitsup Kommuniata suliffeqarfissuup iluani ajornartorsiutinut aaqqiiniarnermi akuutineqarneranut ima tunngavilersuivoq.

- Kommune tassani peqataavoq pissutigalugu suliffissarsiuussisarneq akisussaaffigimmassuk aamma sulisussat qanoq piginnaaneqartigineqarsut aamma taakkua ilai ikiugassaasut nalunngittaramikkit, Jens K. Lyberth oqarpoq.

Jens K. Lyberth oqaluttuarpoq, Qasigiannguani tunisassiorfimmi sulisut amerlanerit  sulilluartuusut. Kisianni aamma ajornartorsiutunit qitiunerarpaa, sulisut ilaasa suliartunngitsoortarnerat ajornartorsiutaasoq, illoqarfinni allani tunisassiorfinni suliffeqarfinnilu allani taama ajornartorsiuteqartoq aamma unnerlugu.

Aamma atuaruk Royal Greenland Qasigiannguani innuttaasunik ataatsimiititsilersoq

- Suliartunngitsoortoqarpat sulisut aalajaatsut sulisinnerusariaqartarput qasutinneqarlutillu, tunisassiat nutaanngilinnginnissaat pissutigalugu, Jens K. Lyberth oqarpoq.

Qasigiannguani tunisassiorfimmi sulisut sulilluartut suliunnaarsinneqartarnerarlugit, sinniisoq Gaba Rosbach aggusti qiteqquttoq isornartorsiuivoq.

Ataatsimiiitaliamik pilersitsineq qanoq isumalluarnartiginersoq, tassunga apeqqutigaarput. 

-  Aqutsisunit tusagassiuutinut oqaaseqaqqusaanngilanga, Gaba Rosbach KNR-imut ullumi oqarpoq.

Jens K. Lyberthilli oqaaseqaqqusinngineq ilisarisinnaanngilaa, sulisunulli ataasiakkaanut tunngasunik oqaaseqarusunnani.

Suliffissuarmi qullersat taarserneqartariaqanerarlugit, kommunalbestyrelsip isumaginninnermut ataatsimiititaliaani siulittaasoq Kristian Jerimiassen sapaatip akunnerani kingullermi oqarpoq.

Ataatsimiititaliortoqarneratali kingorna taama sakkortutigisumik oqaaseqarumanngilaq. Taassuma Royal Greenlandip suliffissuani suleqatigiinnissaq pillugu ataatsimiititaliami sulinertik tusagassiutitigut ingerlakkusunnagu.

- Paaseqatigiilluarpugut. Inerisitaqaqatigiinnissarpullu qilanaarivara, Kristian Jerimiassen oqarpoq.