Qarasaasiatigut saassunneqarneq: Royal Greenlandimiit aningaasarsiassat eqqortut piareeqqajaasut
Royal Greenlandimi sulisut akissarsiassaasa tullii eqqortuussapput.
Tassami aalisakkanik suliffeqarfissuup aningaasarsialerissutaa atuleqqippoq.
Taanna qarasaasiatigut saassunneqarnermit decembarip qiteqqunneranili atorsinnaasimanngilaq.
- Sulisutta juullimi sulerujussuarsimanerisigut akissarsiassat iluatsissimavaat, Royal Greenlandip attaveqarnermut pisortaa, Masaana Egede, oqaluttuarpoq.
AAMMA ATUARUK Royal Greenlandip saassunneqarnera sulisut aningaasiviinut tuppoq
- Taamaasillutik aamma akissarsisussaasut eqqortumik akissarsisinneqassapput, taavalu kingullermik akissarsisitsinermi akissarsiaritikkallakkagut aamma aaqqinneqarumaarlutik, taanna itisiliivoq.
Suli aaqqiigallarnerit atoraat
Piginneqatigiiffissuaq qarasaasiamigut decembari qiteqquttorli saassutarineqalerpoq.
Qarasaasiamigut sutigut qanorlu taavalu qanoq sakkortutigisumik saassunneqarnerlutik Royal Greenlandimeersut oqaluttuariumanngilaat.
Suliffeqarfissuulli ingammik attaveqatigiinnermut akilersuinermullu atortui tamatuminnga sunnigaapput.
Atortullu ilaat suli tamakkiisumik atorneqarsinnaanngillat.
AAMMA ATUARUK Royal Greenlandip qarasaasiatigut saassunneqarnera suli kingunerluuteqartoq
Assersuutigalugu aalisartut tunisaasa akilernissaannut tunngasut.
- Tunisassiorfitta pappialat aqerluusallu allattuinerminni ilaatigut suli atorpaat. Kisianni oqareernittut systemit iluatsikkiartorput, suleriaatsit taamaalillutik aamma oqiliartoqqillutik, Masaana Egede oqarpoq.
Qameriarlugit aallarteqqittarlugit
Royal Greenlandip atortulersuutimi amerlanersaat qamittariaqarsimagai, taanna nassuiaavoq.
- Systemit assigiinngitsut suli misissorpagut. Qujanartumilli arlallit ikinneqaqqipput iluatsikkiartorlutillu. Arriikkaluaqaaq, kisianni ilungersunartuummat aamma ajunngitsumik anigornissaa pingaaruteqarmat, aamma sivisulaarsinnaavoq, Masaana Egede oqarpoq.
Qarasaasiasi saassunneqarunnaarpat, imaluunniit suli saassutarineqarpat?
- Qarasaasiat saassunneqaraangata, taanna akiuminaattarpoq. Saassussinerup sunniutai sinneqarnersut maannakkut misissorparput, Masaana Egede akivoq nangillunilu:
- Qarasaasiatta saassunneqarnerat qaqugu aningussaneripput oqarsinnaanngilanga. Pitsaasoq tassaavoq, atortulersuutitsinnik ikititerileratta, atortuttalu ilaat nalinginnaasumik atorsinnaaleqqimmata. Kisianni atortulersuuteqaqaagut, aamma nunani tamalaani sulisuuvugut, taamaammat tamakkiisumik sulileqqinnissatsinnut piffissaqarluartariaqarpugut.
