Qaqortup eqqaavissuani ikuallannera qaminneqartoq
Qaqortumi eqqaavissuaq ippassaq ualikkut ikuallalersoq maanna qaminneqarpoq.
- Ikuallannera aqunneqarsinnaalersoq qatserisartut ullaaq manna nalunaarutigaat, ikuallanneralu qaminneqangajalersorlu nalunaarutigineqarluni, Kalaallit Nunaanni Politiit pigaartuisa pisortaat Ole Hald KNR-imut oqarpoq.
Qaqortumi eqqaavissuup ikuallannera politiinut ippassaq arfininngornermi ualikkut nalunaaqutaq pingasunut qiteqqulluinnalersoq, 14.26, kalerrinneqarput.
Qatserisartut taamanikkulli eqqaavissuarmiipput qamisaallutillu, qulimiguulillu qamisaanermut aamma atorneqarluni.
Eqqaavissuup nammineerluni ikuallalersimanera ilimagalugu politiit oqaatigaat. Eqqaavissuup nalaani inoqarnera pissutaalluni ikuallannera paasineqapallappoq.
Qaqortumi innuttaasut eqqaavissuarmut qanittumi najugallit matut igalaallu matoqqatikkallassagaat politiit kaammattuutigaat, eqqaavissuarmi suli pujuliormat.