Qaqortumi angut 36-nik ukiulik toqutsisimasutut pasineqartoq iperagaasoq
Angut 36-nik ukiulik 2023-mi februaarip qulingiluaani Qaqortumi politeeqarfimmukarluni toqutsisimasutut imminut nalunaarutigivoq.
Angut tigusarineqarpoq, kingornalu Eqqartuussisoqarfik Kujallermit tigummigallagassanngortinneqarluni, politiillu toqutsisoqarsimanermik misissuillutik erngertumik aallartipput.
Misissuisoqarneranut atatillugu Qaqortumi Vatikanbakkenip qanittuani ilaatigut assaasoqarlunilu politiit qimmii atorlugit takussutissarsiortoqarpoq.
Misissueqqissaartoqarnerani nassaartoqanngilaq, Eqqartuussisoqarfik Kujalliullu tamanna pissutigalugu angut 36-nik ukiulik iperarniarlugu pingasunngornermi aalajangerpaa.
Politikommissæri, Malik Sandgreen misissuieqqissaarnermi aqutsisuusoq ima nassuiaavoq:
- Suliami suli misissuivugut, suliamilu erseqqinnerulersitsisinnaasunik suli misissugassaqarluta. Maannamulli misissuinerput pasineqartup nassuiaataanut tunngavissiinngilaq, taamaammallu eqqartuussisoqarfiup pasinninnermut tunngavik tigummigallaaginnarnissamut tunngavittut annikippallaarsoraa. Taamaammat angut maanna iperagaavoq.
Unnerluussisussaatitaasup tamanna aamma tunngavigalugu eqqartuussisoqarfiup aalajangernera aalajeqqitassanngortinngilaa. Naak angut 36-nik ukiulik tigummigallagaajunnaaraluartoq taanna suliamut atatillugu suli pasineqarpoq. Politiillu innuttaasut toqqissisimannginnissaannut tunngavissaqanngissoraat.
