Politiit Qaqortumi toqutsineq pillugu misissueqqissaarnertik nangeqqikkaat
Angut 35-nik ukiulik Qaqortumi politeeqarfimmut 2023-mi februaarimi saaffiginnippoq, taassumalu nammineq toqutsisimanini nassuerutigaa.
Tamanna politiit Qaqortumi ilaatigut Vatikanbakkenip eqqaani misissueqqissaarnerannut annertuumut aallarniutaavoq.
Ukiuuneranili silap qanoq innera pissutigalugu Kalaallit Nunaanni Politiit suliamik misissueqqissaarsinnaanngillat.
Maanna aput qerinnartorlu aangaatsiarnikuupput, taamaammallu politiit sumiiffimmi misissueqqissaarnertik nangeqqikkaat, Qaqortumi Politeeqarfimmi immikkoortortami aqutsisoq, politikommissæri, Søren A. Hansen tusagassiuutinut nalunaarummi ullumi oqarpoq:
- Silap kiannerulernerata misissueqqissaarnitsinnik qaammatialuit matuma siorna unitsikkallakkatsinnik nangitsisinnaalersippaatigut. Taamaammat Vatikanbakkenip eqqaani illoqarfimmilu sumiiffinni allani isaannatsinnik takusinnaanngisatsinnik piffissami aggersumi qimmilerluni misissuisoqassaaq, taanna oqarpoq.
Kinaaneranut paasissutissaqanngitsoq
Arnaq 35-nik ukiulik Qaqortumi 2021-mi novembarimi tammarpoq.
Naalli politiit, qatserisartut, Issittumi Sakkutooqarfik namminerlu kajumissutsiminnik peqataasunik ujaasigaluartut nassaarineqanngilaq. Arnaq kingullermik Kommune Kujalliup allaffiata silataani unnukkullu Brugseneeqqap qanittuani kingullermik takuneqarpoq.
Vicepolitiinspektøri, Lars Bjerregaard KNR-imut taamani oqarpoq:
- Tassunga atatillugu paasissutissiissutigissavara suliaq siammasissumik misissuiffigigatsigu, matumani ilanngullugu tamanna Qaqortumi arnap 35-nik ukiullip 2021-mi novembarimi tammaaneqalersup, kingornalu takuneqaqqissimanngitsup ujaarineqarneranut attuumassuteqarnersoq paasiniarlugu.
Politiilli angutip toqutsineq nassuerutigisaa tammaasoqarneranut suliamut attuumassuteqarsinnaasoq paasissutissiissutigaat.
Politikommissærilli, Søren A. Hansenip arnaq taanna pineqarnersoq oqaaseqarfigiumanngilaa:
- Sumik ujaasinerlutik annerusumik oqaaseqarfigisinnaanngilara – kisianni qimmit naamasinnaasaat takussutissaasinnaasut tamarmik soqutigigaagut.
Kalaallit Nunaanni Politiit sumiiffinnik aalajangersimasunik aallaqqaataasumik assersuilernavianngitsut Qaqortumilu innuttaasut nalinginnaasumit allaanerusumik iliuuseqartariaqanngitsut tusagassiuutinut nalunaarummi paasissutissiissutigaat.
Politiilli piffissami aggersumi sumiiffinni misissuiffigisaminni akornusersorneqannginnissartik kaammattuutigaat.
Politiit maajip ulluisa 19-anit sapaatillu akunneraagallartumi qimmilerlutik misissuinissartik naatsorsuutigaat. Angut 35-nik ukiulik suliamut atatillugu suli tigummigallarneqarpoq.
