Qapiarfiusaami aneerasaartarfiit iluarsartuunneqalersut
Qapiarfiusaami inissiat ilaanni aneerasaartarfiit nakkaateriaannaasut 2016-mi KNR-imit oqaluttuaraarput.
Maannalu Namminersorlutik Oqartussat Qapiarfiusaami aneerasaartarfiit blok 11-17miittut iluarsaanneqarnissaat suliarinnittussarsiuussimalerpaat, juunillu naalernerani suliaralugit aallartinneqarsinnaanngorsimallutik. Inissiaatileqatigiiffik INI A/S taama ilisimatitsivoq.
Aneerasaartarfiit iluarsartuunneqarnissaat 2019imi oktobarip tungaanut pissasoq aamma ilisimatitsissutigineqarpoq.
Suliarineqarneri sivisussapput
Pilersaarutit malillugit blok 12 13-lu ukioq manna suliarineqassapput. Ukiup tulliani blok 15, 16 aammalu 17 iluarsaanneqassallutik, 2019-milu blok 11-mi 14-milu aneerasaartarfiit iluarsartuunneqassallutik.
Iluarsartuussinerup nalaani aneerasaartarfiit matoorneqartassapput, ajornartorsiulernermili qimaaffittut atorneqarsinnaassallutik.
Iluarsartuussinissaq pillugu najugaqartut ilisimatinneqareerput. Soqutiginnittulli iluarsartuussinerup nalaani Facebookikkut quppernermi ”Altanit Qapiarfiusaami” iserfigalugu malinnaasinnaapput.