Aneerasaartarfiit nakkaattooriaannaasut
![](/sites/default/files/styles/image_934x467/public/article_images/altan.jpg?itok=3TuMR6_D)
Nuummi Qapiarfiusaami blokkini 11-mit 17-imut attartortut, inissiaatileqatigiiffimmit Illuut A/S-imit allagarsipput aneerasaatarfiit pisariaqavitsinnagu atorneqassanngitsut, ajornartoornermilu aatsaat atorneqarsinnaasut.
Aneerasaartarfiit suliarineqarnissaat inissiaatileqatigiiffiiup suliariumannittussarsiuuppai aappaagulu naammassillugit suliarineqarnissaat naatsorsuutigineqarluni.
Aneerarsaartarfinnik ajornartorsiuteqarneq Nuummi Narsarsuarmi aamma atuuppoq. Aneerasaartarfiit blok 2-miittut aamma blok 3-miittut siorna novembarimi peerneqarput.
Arnaq 32-inik ukiulik blok 2-mi najugaqartoq mikisunillu marlunnik meeraqartoq KNR-imut oqaluttuarpoq inissiami najugaqarfigisaminni aneerasaartarfiup ilaa siorna novembarip qaammaataani peerneqarsimasoq, aalaqqajulersimanera pillugu inissiaatileqatigiiffimmut nalunaarutigineqarnerata kingorna.
Aneerasaartarfiup ilaa siornali peerneqarmat taarserneqanngilaq aamma susoqassaneranik nalunaaruteqartoqarani.
Arnap 34-nik ukiullip aneerasaartarfiup ilaata sananeqannginnera toqqissisimanartinngilaa, meeqqani mikisut nakkarsinnaammata.
Nuummi Narsarsuarmi blok 3-mi aneerasaartarfiup ilaa aamma peerneqarnikuuvoq. Tassani maannakkut najugaqartoq KNR-imut oqaluttuarpoq aggustip qaammataani inissiamut tassunga nuussimallutik paasitinneqarsimanatillu sooq aneerasaartarfiup ilaa peerneqarsimanersoq aamma nutaamik sanasoqassanersoq.
Aneerasaartarfiup ilaanik nutaamik sanasoqarsimannginnera tassani najugaqartup aamma toqqissisimanartinngilaa.
Inissiaatileqatigiffik A/S INI inissianik nakkutilliisuusoq KNR-imut oqaluttuarpoq, aneerasaartarfiit suliarineqarnissaat suliffeqarfimmut siunnersuisarfimmut LH siunnersortimut tunniussimallugu. Suliffeqarfik LH siunnersorti Leif Hansen Bygherrerådgivningimit Ballerupimi angerlarsimaffeqartumit pigineqarpoq.
LH Siunnersortip oqaluttuarisinnaanngilaa blok 2-mi blok 3-milu aneerasaartarfiit suliarineqarnissaat qaqugu pissanersoq, KNR-ilu innersuunneqarpoq inissiaatileqatigiiffimmut A/S INI-mut saaffiginneqqullugu. A/S INI LH siunnersortimut saaffiginneqquneqarpoq LH siunnersortili attavigineqarsinnaasimanngilaq.