Qanoruup aallakaatittarnera allanngussaaq
- Piffissami sivitsortumi oqaluuserisimavarput Qanoruup qallunaatut allagartalersorneqarluni aallakaateqqittarfia kingusippallaannginnersoq. Maanna Danmarkimi TV-aviisip aallakaatittarfia qulip qeqqanut kinguartinneqalerpoq tamannalu isumaliutigisareersimasatsinnut tulluarpoq. Taamaammat qulingiluaniit nutaarsiassaqartitsineq Qanoruup isumagisalissavaa, KNR-mi nutaarsiassaqartitsinermut pisortaq Mikkel Bjarnø Lund oqarpoq.
Arlalinnit aamma apersuutigineqartarsimavoq sooq Qanorooq allagartalersorneqareerluni siullermik aallakaatinneqartannginnersoq. Taamatulli iliornissaq ajornakusoorpoq.
- Qanorooq toqqaannartumik aallakaatittarparput aammalu aallakaatinneqarnerata nalaani toqqaannartumik ilanngutassiisarnerit pingaartippagut. Aamma aallakaatitsivimmi pulaartoqartarpugut tusagassat kingullerpaat ilanngussinnaajumallugit. Ilanngutassiat taama ittut allagartalersorneq ajornarput siumut ilisimareerneq ajoratsigut apersugassatta qanoq oqaaseqarnissaat. Taamaammat Qanorooq siullermik aallakaatinneqareeraangat aatsaat nutserisoqarsinnaasarpoq, Mikkel Bjarnø Lund oqarpoq.
Ataasinngorneq septemberip pingajuaniit Qanorooq pisarnertut siullermik nalunaaqutaq 19.00 aallakaatinneqartassaaq qallunaatullu allagartalersorneqarluni nalunaaqutaq 21.00 aallakaateqqinneqassalluni.
