Qanoq ilisoqarpat kikkut Inatsisartunut ilaasortanngussappat?

Manna tikillugu Naalakkersuisuusuni IA arfinilinnik naalakkersuisuutitaqarpoq, Demokraatit marlunnik Kattusseqatigiit Partiiallu ataatsimik. Pissutsit taakkua aallaavigigutsigit nutaanik Naalakkersuisoqalerpat Siumukkormiunut sinniisuusut arfinillit imaluunniit arfineq marluk Inatsisartunut ilaasortanngussapput, naalakkersuisooqatigiligaallu sinniisuminnik marlunnik imaluunniit pingasunik Inatsisartunut ilaasortaattitaqalissallutik.

Siumukkut akornanni sinniisut ilimanaateqarneri naapertorlugit imatut tulleriaarneqarput: Anders Olsen, Nanortalik; Kaj Lyberth, Qaqortoq; Per Berthelsen, Nuuk; Ruth Heilmann, Maniitsoq; Saxtorph Didriksen, Nuuk; Nick Nielsen Ilulissat kiisalu immaqa Vittus Maaru Mikaelsen, Tasiilameersoq. Partii Inuit naalakkersuisooqataalissappata siullertut Lars P. Mathæussen tulliatullu Mitti Lynge, tamarmik Nuummeersut, siullerpaamik Inatsisartunut ilaasortanngorsinnaassapput. IA naalakkersuisunngoqataassappat ukua ilaasortanngorsinnaapput: Harald Biance, Tasiilaq; Stine Egede Nørbæk, Qaqortoq immaqalu Astrid Fleischer Rex. Atassutip sinniisuutitai tassaapput Gerhardt Petersen, Qaqortoq kiisalu Mala Høy Kuko Tasiilameersoq.

Taamaalillutik IA-miit Aatsitassaqarnermut Naalakkersuisuusimasoq Ove Karl Berthelsen aamma Olga P. Berthelsen ilaasortanngunngitsoorput, kiisalu Anda Uldum aamma Justus Hansen, Demokraatineersut kiisalu Knud Kristiansen Atassummeersoq Inatsisartunut ilaasortanngoqqinngitsoorput.