Qanoq akissarsiaqartigineq malillugu akileraartitsisalernissaq Naalakkersuisooqatigiit arajutsisitsillutik eqqunniarsaraat

Pilersaarummi immikkoortut arlallit iluarinngilai. Per Berthelsenillu qanoq akissarsiaqartigineq malillugu akileraartitsisalernissamik arajutsisitsilluni eqqussiniarnertut isiginerarpaa. Tamannalu naalakkersuisooqatigiinni partiit anginersaata IA pingaartitarisaasa ilagaat.

-Soraarnermusiassatut katersukkanik akileraartitsisalerniarnerup, iluanaarniarluni aningaasaliissutitigut iluanaarutit isertitallu akileraaruteqalersitsiniarnerup ineqarnermilu akiviit atulersinniarneqarnerisa takutippaat, naalakkersuisooqatigiit isumaqartut inuiaqatigiinni atugarissaarnissaq innuttaasut nammineerlutik aningaasalersussagaat. Aammattaaq nammineq illunut aningaasartuutit erniatigut ilanngaataasarnerat apparniarneqarpoq, Tamanna aamma nammineq initaarnissamik kajungernermut apparsaataassaaq taamallu pisortat inissiaataat amerlisariaqassallutik, Per Berthelsen nassuiaavoq.

Berthelsenittaaq utaqqiisaasumik inissianut akileraartitsisalernissamik, nammineq iniutinut aningaasartuutit erniaat tunngavigalugit akileraarutitigut oqilisaassisarnerup appartinnissaanik, nalikilliliisinnaanerup allanngortinneqarnissaanik akiliunneqarlunilu sulinngiffeqarnermi angalasarnermut akileraartitsisalernissamik    naalakkersuisooqatigiit pilersaaruteqarnerat iluarivallaanngilaa. Naatsumik oqaatigalugu, Per Berthelsen nunatsinni naalakkersuisut taarserneqarnissaat kissaatigaa.

-Siusinnerusukkut aqqutissatut piukkunnarsinnaasutut taanikuuara Namminersortut suliffeqarfiutaannik tamakkiisumik ilaannakortumilluunniit namminersortunngorsaanissamik misissuilernissaq aammalu Nukissiorfiit piginneqatigiiffinngortinnissaa Landskarsi imaarunnikuusoq isumalluutigiunnaarlugu atuisartunut iluaqutaasumik ineriartortinneqarnissaa pisariaqartunik nammineq avataanit taarsigassarsinikkut ingerlanneqarsinnaasunngorlugu, Per Berthelsen oqarpoq.