Qanigisamik annaasaqarnermi aliasunnermi sulinngiffeqarneq sivitsorneqassava?
Ilaquttamik qanigisamik annaasaqaraanni akilikkamik ulluni arfineq-pingasuni ullumikkut sulinngiffeqartoqarsinnaavoq, siunnersuutilli tamanna qaammatinut arfinilinnut sivitsorniarpaa.
Rosannguaq Rossen uinilu ernerminik 16-inik ukiulimmik siorna annaasaqarpoq, taassuma ullut arfineq-pingasut naammanngissorai. Taamaattumik siunnersuut taperserpaa.
- Pisup nalaani eqqarsarsinnaanngilagut, naluarput ulluinnagut qanoq ingerlateqqilissanerlugit. Piffissaq sivisooq taanna sungiunniarsarivarput aamma suli ullumikkut sungiunniarsarivarput. Kisianni una suliffeqarfimminngaanniit imaluunniit inuiaqatigiinninngaanniit akorneqarnerput pingaaruteqartorujussuuvoq, taamaammat neriuppunga inatsisissatut siunnersuutigineqassappat akuersaarneqassasoq, Rosannguaq Rossen oqarpoq.
Inuiaqatigiinnut iluaqutaassava?
Aliasunnermi sulinngiffeqarsinnaatitaanerup sivitsorneqarnera 137 millioninik akeqassasoq isumaginninnermi naalakkersuisumit Jess Svanemit Peter Olsenimut (IA) akissummi allassimavoq.
Politikerip siunnersuut 2023-mi ukiakkut ataatsimiinnermi apeqqarissaarnertalimmik oqallinnermi siunnersuutigaa, Rosannguaq Rossenilu aperigaanni qularutissartaqanngilaq.
- Inuiaqatigiinnut iluaqutaasinnaappat siunissaq ajunnginnerusoq atorneqarsinnaappat soorunami taanna uanga isumaqarpunga salliutinneqarsinnaassasoq, Rosannguaq Rossen oqarpoq.
Taanna nammineq ernerminik annaasaqareerluni qaammatini marlunni sulinngiffeqarpoq.
Siullermeertumik siunnersuutigineqanngitsoq
Aliasunnermi sulinngiffeqarsinnaatitaaneq pillugu aatsaat apeqquteqartoqanngilaq. Demokraatinit Nivi Olsenip Inatsisartuni 2023-mi ukiakkut ataatsimiinnermi oqallinnermi assingusumik aamma siunnersuuteqarpoq.
Taassuma angajoqqaat meeqqamik 18-iliineqanngitsumik annaasaqartut ulluni arfineq-pingasuinnarni sulinngiffeqartitaasinnaanerat naammanngissoraa.
Jess Svanemit Peter Olsenimut akissummi meeqqanik 18-it inorlugit ukiulinnik ukiuni kingullerni qulini ukiumut agguaqatigiissillugu 17-inik toqusoqartartoq allassimavoq.
Angajoqqaanut annaasaqartunut aningaasartuutit 2,6 millionit koruuniussapput.
Sinneri 135 millionit angajoqqaanut meeqqaminnik 18-ileereersimasumik imaluunniit inunnut angajoqqaaminnik, aapparminnilluunniit annaaqartunut aningaasartuutaassapput.
Aliasunnermi sulinngiffeqarsinnaaneq sivitsorneqassanersoq Inatsisartut suli aalajangiiffiginngilaat.
